काठमाडौं । चिनियाँ साँस्कृतिक केन्द्रले चिनियाँ योगा (थाईची छ्वान) १३ फम तालिम सम्पन्न गरेको छ । बुधवार काठमाडौं स्थित महाराजगंजमा रहेको आफ्नो कार्यलय परिसरमा केन्द्रले एक कार्यक्रम आयोजना गर्दै सो तालिम समापन गरेको हो ।
यस अघि थाईची छ्वानको ८ फम तालिम समेत प्रदान गरेको केन्द्रले १३ फम तालिम प्रदान गरेको हो । विगत पैतिस वर्षदेखि थाईची छ्वान प्रशिक्षण गर्दै आएका प्रमुख प्रशिक्षक मचारत्न महर्जन र सह प्रशिक्षक आङ बाबु लामा रहेको यस तालिममा तीन महिनादेखि ३६ जना प्रशिक्षार्थीले सहभागिता जनाएका थिए । केन्द्रले पुनः पाँच गते सोमवारदेखि आफ्नै कार्यलय परिसरमा थाईची छ्वानको २४ फम प्रशिक्षण गर्ने जनाएको छ ।
प्रमुख प्रशिक्षक महर्जनले प्रशिक्षार्थीहरूले यस पटक राम्रो सँग थाईची खेल्न सिकेको बताए । उनले शारीरिक तथा मानसिक तन्दुरुस्त रहन श्वासप्रश्वासको माध्यमबाट थाईची छ्वान् खेल्न जरुरी रहेको बताए ।
थाईची छ्वान समापन गर्दै बुधवार केन्द्रले चिनियाँ चाड युआन स्याओ (लालटिन) चाड समेत मनाएको छ । केन्द्रले चिनियाँ परिकार युआन स्याओ खाँदै यस चाडलाई मनाएको छ ।
वि.सं.२०८१ फागुन १ बिहीवार २२:२८ मा प्रकाशित
