हामी सबैकाे संसारन्यूज

दीनानाथ पोख्रेल, सुम्बेक, इलाम

हाम्रा ज्येष्ठ अथाह ज्ञान निधि हुन् जानेर सिक्ने गरौँ ।
सङ्ला सत्पथ दिव्य धार बटुलौँ सायुज्य आभा छरौँ ।।
उम्दा मूल बुझौँ सुकृत्य पथका हुन् दृश्य यी ईश्वर ।
चोला सार्थक पार्न ज्ञान नटिपे आउन्न हाँसो घर ।।०१।।

पाले सौख्य दिएर नित्य यिनले उल्लास वर्षा गरे ।
खाली पेट बसे स्वयम् कहरमा सन्ताप मेरा हरे ।।
मेरा हर्ष टिपेर नित्य करमा राखेर हाँसो छरे ।
यो संसार चिनाउने हितकला मेरा गिदीमा भरे ।।०२।।

के हो गर्न सुयोग्य कर्म हितको ? संसारका खातिर ।
मर्दा बाँच्न सकिन्छ दीप युगको बाल्यो भने आखिर ।।
मान्छेझैँ म बने विशाल भवले पुज्नेछ उम्दा गनी ।
बस्छन् छाप अनन्तसम्म जगमा सायुज्यमैत्री बनी ।।०३।।

वृद्धावृद्ध सँगै बढे सब कुरा छन् शिल्प वा ज्ञानका ।
सोधी आर्जन गर्न नित्य म सकूँ सामुज्यको पानका ।।
अग्ला शैल समान कर्म गुण छन् त्यागेर दुख्ने किन <
जागा कान, हियो ,दिमाग म गरूँ उत्थानमा लम्किन ।।०४।।

के हो कृत्य अकृत्य < बुझ्न म सकूँ सत्कर्म टिप्ने बनूँ।
पाका मानव देवतुल्य गनिने सन्मार्ग यौटा खनूँ ।।
नौलो जोश उमङ्ग भर्न म सकूँ पाका बनून जागृत ।
आफू सक्रिय कर्ममा रत रहून् छानेर सक्ने कृत ।।०५।।

उम्दा कृत्य सिकाउने अवनिका हुन् वृद्ध अध्यापक ।
गर्दा सङ्गत भाग्दछन् डर सबै खोज्दै क्रियाका हक ।।
दुर्छे चिन्तन हट्दछन् मगजका भाग्नेछ मैलो धक ।
आफ्नो जीवन उठ्छ उच्च तहमा बन्नेछ सङ्लो जग ।।०६।।

छन्द – शादूर्लविक्रीडित
गण – म स ज स त त गु
सङ्केत – SSS – IIS – ISI – III – SSI – SSI – S