हामी सबैकाे संसारन्यूज

अच्युत घिमिरे, सर्पाङ, भुटान

१.
अँध्यारो रातको बात
एक टुक्रा जूनसँगै
यहाँ टिमटिमाउँछ जातपात

२.
फालेको फेरि चाहियो
अफ्ठ्यारो बुद्धिले गर्दा
यस्तो दुःखकष्ट पाइयो ।

३.
मनको पत्रमा लेखिन्छ
आफ्नै विस्थापनका कुराहरू
सम्झिँदा झिल्काजस्तै देखिन्छ ।

४.
दुःखको पहाड भत्काउँदै
सपनाले बाटो कोर्छ
आशाको उज्यालो देखाउँदै ।

५.
हिलोमैलो खेल्ने हातलाई
कलम चलाउन लाउँदा
जनाइ हाल्छन् जातलाई ।

६.
यही अन्धकारभित्रको यापना
बल्छ उज्यालो बनेर
गरे सफलताको स्थापना ।

७.
हजारौँ आँसु पुछेर
संसार जित्छ उसैले
हाँसोखुसी सँगसँगै मुछेर ।

८.
एउटा मिठो सम्झना
मनको कुनामा टल्किरहन्छ
पुराउँदा अधुरो सपना ।

९.
समयको आँधीले उडाउँदा
साहस भित्रियो भने
टेर्दैन भ्रमले डुबाउँदा ।

१०.
उँचाइको शान देखाउन
चाहिँदैन भण्डार धनको
मुहारमा मुस्कान लेखाउन ।