हामी सबैकाे संसारन्यूज

उत्तम विचार, नुवाकोट

के के तत्त्व मिलेर बन्छ कविता भन्द्यौन ए सज्जन
जान्ने चाह हुँदा समस्त कविमा यो प्रश्न गर्दै छु म ।
ती हैनन् कविता जहाँ कवि कला सौन्दर्य छैनन् भने
ती बन्छन् कविता विधान लयका उद्यानमा फक्रिने ।।१।

के हो सूत्र कहाँ अडान म गरूँ के नाम हो छन्द के
कस्ता फूल उनेर बन्छ कविता पाइन्छ सौगन्ध के ।
ती हुन्नन् कविता जहाँ मधुरता पाइन्न सुन्दा भने
श्रोता पाठकमा हुनेछ कविता झङ्कार छुट्टै दिने ।।२।

गाँसी शब्द थुँगा उनूँ म कविता माला बनाऊँ कि म
बाङ्गा अस्त्र समान शब्द बटुली भाला भनाऊँ कि म ।
ती हुन्ननन् कविता विनावजनका भारी उचालेसरि
ती हुन्छन् कविता जहाँ गहकिला छन् भाव भन्छे चरी ।।३।

लाखौँ छन् कविता रचेर कविको चर्चा बटुल्नेहरू
भन्दैनन् तिनले बुझेर कविता साहित्य सेवा गरूँ ।
मात्रै हुल्लडमा रचिन्न कविता सुक्नेछ त्यो भेल हो
शिल्पी हो गर ख्याल बन्छ कविता जो शब्दको मेल हो ।।४।

रोपी अक्षर शब्दका बिउ छरी बाली झुलाऊँ कि म
बारी खेत गरा कुना र डिलमा आँखा डुलाऊँ कि म ।
भोको पेट भुलेर हुन्न कविले संघर्ष देखे भने
बन्नेछन् कविता स्वयम् कलमले नेपाल लेखे िभने ।।

छन्द – शादूर्लविक्रीडित
गण – म स ज स त त गु
सङ्केत – SSS – IIS – ISI – III – SSI – SSI – S