हामी सबैकाे संसारन्यूज

कल्पना अधिकारी भट्टराई, काठमाडौं

बढेको छ अन्याय यो देशभित्र ।
भएको छ नाङ्गो उदाङ्गो चरित्र।।
खुलोस् चेत सद्भावको गीत गाओैँ ।
खुसी भर्न उत्साहको रङ्ग लाओैँ।१।

घसौँ माथमा देहमा सप्त रङ्ग ।
छरोस् फागुले चेहरामा उमङ्ग।।
सबै आसुरी भाव–भंगी भगाओैँ।
खुसी भर्न उत्साहको रङ्ग लाओैँ।२।

अहंकार मात्सर्य हो शत्रु कंस ।
यिनै हुन् सादाचार मास्ने नृशंस ।।
अहम् दन्दनी होलिका झैँ डढाओैँ।
खुसी भर्न उत्साहको रङ्ग लाओैँ।३।

गरौँ प्रेम न्यानो सबै मित्रसाथ।
उनौँ एकता सूत्रमा यो समाज।।
बढोस् भाइचारा, वितृष्णा हटाओैँ।
खुसी भर्न उत्साहको रङ्ग लाओैँ।४।

छ संस्कार जो सभ्यताको निशानी ।
खुलाओस् यसैले सुनौलो बिहानी ।।
उनै भक्त प्रह्लादको मार्ग धाओैँ ।
खुसी भर्न उत्साहको रङ्ग लाओैँ।५।

छन्द – भुजङ्गप्रयात
गण – य य य य
सङ्केत – lSS – lSS – lSS – lSS