काठमाडौँ । पछिल्ला राजनीतिक आन्दोलनमा सबैभन्दा कम भूमिकामा देखिएका वर्तमान प्रधानमन्त्री खड्ग प्रसाद ओली कम जिम्मेवार बढी उत्ताउलो बन्दै गएका छन् । २०६२/६३ को आन्दोलन ताका “बयल गाडा चढेर अमेरिका पुग्नु र अहिलेको आन्दोलन सफल हुनु एउटै हो” भनेर दिएको अन्तरवार्ता अहिले पनि इन्टरनेटमा भेटिन्छ ।
सोमबार नेपाल विद्युत् प्राधिकरणका प्रबन्ध निर्देशक कुलमान घिसिङलाई बर्खास्त गरेर आगोमा घिउ थपेका वर्तमान प्रधानमन्त्री खड्ग प्रसाद अझै उत्ताउलो बन्दै गएका छन् । हुन त सरकारमा हुँदा ओलीको विगत भाषणमा जति आशावादी देखिन्छ सरकारमा नै हुँदा र प्रतिपक्षमा हुँदासमेत उनले गर्ने क्रियाकलाप भने बिर्सन लायक देखिन्छन् । उनले कुलमानलाई यस्तो समयमा बर्खास्त गरेका छन् जुन समयमा सत्ता गठबन्धनका क्रियाकलापका कारण इतिहास बनिसकेका राजावादीहरूसमेत ठूलो सङ्ख्यामा राजतन्त्रको पुनर्स्थापनाको पक्षमा आन्दोलन चर्काउन लागिरहेका छन् ।
प्रतिपक्षमा हुँदा सरकारलाई अशोभनीय गालीको वर्षा, सरकारमा हुँदा नि उस्तै
केही वर्ष अघि ओलीले आफू प्रतिपक्षमा भएको बेला तत्कालीन सरकारलाई ‘अलच्छिनी’ भएको बताएका थिए । उनले तत्कालीन प्रचण्ड नेतृत्वको सरकार बनेदेखि नै गाडी दुर्घटना भएको भन्दै आमसभामा नै कस्तो अलच्छिनी सरकार भनेर आफ्नो उत्ताउलोपना देखाएका थिए ।
अहिले काँग्रेस एमालेसहित प्रतिनिधि सभामा दुई तिहाइको नेतृत्व गरिरहेका ओलीले मङ्गलवार पनि प्रतिपक्षलाई गाली गर्न मानै व्यस्त देखिन्थे । उनको पार्टी निकटको इन्जिनियरहरूको कार्यक्रममा उनी प्रतिपक्षी दलहरूलाई काम गर्न व्यवधान गरिरहेको आरोप लगाई रहेका थिए । तर, उनी यति उत्ताउलो भएको देखिन्छ की उनले आफ्नै नेतृत्वको दुई तिहाइको सरकारसमेत बिर्सिरहेका छन् ।
संसद्मा प्रतिपक्षको उपेक्षा
प्रतिपक्षले काम गर्न नदिएको आरोप लगाउने तिनै ओली गत माघ २४ गते प्रमुख प्रतिपक्षी दलको नेताले संसद्मा सम्बोधन गरिरहँदा बालुवाटारमा मिस पविलगायतका टिकटकरहरुसँग रमाइरहेका थिए । हुन त ओली प्रायः आफ्ना कुरा सुनाउनुपर्ने समयमा बाहेक संसद्मा कमै उपस्थित हुन्छन् । तर, उनी अरूको कुरा सुन्न भने त्यति रुचिकर देखिँदैनन् ।
कूटनीतिक मर्यादा विपरीत सत्यमेव जयते की सिंहमेव जयते भन्दै छिमेकीलाई गाली
तत्कालीन नेकपाको सरकार भएको बेला करिब दुई तिहाईको प्रधानमन्त्री बनेका ओलीले कालापानी, लिम्पियाधुरा र लिपुलेकको विषयमा संसद्को रोष्टमबाट उत्ताउलो पाराले भारतलाई सत्यमेव जयते कि सिंहमेव जयते ? भन्दै प्रश्न गरेका थिए । त्यसको केही महिना पनि नबित्दै तिनै ओलीले भारतीय जासुसी संस्था ‘रअ’ का प्रमुख सामन्त कुमार गोयललाई मध्यरातमा बालुवाटारमा मन्त्रणा गरेर भेटेका थिए ।
बलात्कार आरोपीको संरक्षण
बलात्कारको आरोप लागेका एमालेका नेता शेरधन राई, ऐन महर र महेश बस्नेतहरूलाई सत्ताको आडमा उन्मुक्ति दिइरहेका खड्ग प्रसादले केही महिना अघि एमाले पार्टी कार्यालय च्यासलमा बसेको केन्द्रीय समितिको बैठकमा नै आफू योजना विनाको प्रधानमन्त्री भएको आशयको भनाइ राखेका थिए । “एमाले कहिल्यै सरकारमा आउन सक्दैन भनियो तर सरकारमा आयो ” ओलीले भनेका थिए । उनको जम्मा उद्देश्य प्रधानमन्त्री भएर नाम लेखाउनु मात्र हो । यो उनका क्रियाकलापले नै पुष्टि गरिरहेको छ ।
त्यस्तै तत्कालीन नेकपाको दुई तिहाइ को सरकार भएको बेला पार्टीभित्र आफ्नो विरोध गर्नेहरुलाई अराजकको संज्ञा दिएका ओलीले अफू नभए कुर्सी भाँचिदिने बताउँदै संसद् विगठन गरेका थिए । त्यसलाई पछि सर्वोच्च अदालतले उल्टाइदियो भने अदालतले नै नेकपा पनि विगठन गरिदिएको थियो ।
खड्ग प्रसादले उनकाे याे उत्ताउलाे गतिविधिलाई निरन्तरता दिइरहेभने उनले उनलाई र उनकाे पार्टीलाई त भड्खालाेमा हाल्ने नै छन् तर देश नै भड्खालाेमा जाने हाे की भन्ने चिन्ता राजनीतिक क्षेत्रका जानकारहरूले व्यक्त गरेका छन् ।
वि.सं.२०८१ चैत १२ मंगलवार १७:१९ मा प्रकाशित
