हामी सबैकाे संसारन्यूज

घनश्याम पौडेल, पोखरा

यताका नेताका चटचट गला रेट्दिन सकौँ
कि झन्डा ओढाएर शहिद भनी भेट्दिन सकौँ।
हिजो भन्दा वेशी सहन अति नै मुश्किल भयो
गर्थ्यौ पैले जे दिनदिन झनै बञ्चित रह्यो ।१।

खुशी छैनन् कोही रतिभर यिनै शासकसँग
भिडेकै हौ भिड्छौँ असहज परे बाधकसँग ।
उखेलेथ्यौ राणा कुलघरनियाँ आसन पनि
डटेथ्यौँ ऊ बेला विपरित हुँदा मासन भनी ।२।

खुबीवाला हैनन् परिचित थियौ रक्षकसँग
डराइन्थ्यौ थोरै हृदय नहुने भक्षकसँग।।
हुलै बाँधी जाने डर भर बिना बन्दुकसित
थियो खत्रा धेरै शहरतिरका फन्टुससित ।३।

पठायौँ हामीले मनमत दिई हुन्छ कि भनी
मिलाएछन् घाँटी रिपुजनसँगै लम्पट बनी ।
लडेथ्यौँ छातीमा रगत बहने त्यो पल भरि
धकेलेथ्यौँ वैरी उस समयमा आपद परी ।४।

उठौँ है नेपाली सुजन अब योअन्तिम घडी
अबेला भै सक्यो अब त नउठे चल्दछ छडी ।
पठाएथ्यौँ छानी खुब असलका मानिस भनी
असन्तोषी निस्के कपुतजन ती माहुर बनी ।५।

गला जोडी खाने महलतिर यी आपस मिली
बिरोधी झैँ बन्दा तलतिर यिनै हुन्छ फिलिली ।
कुचेष्टा गर्दैछन् तर पनि अझै भोटर अघि
हुने छैनौँ भेडा जति सरल या हुल्लड अति ।६।

छन्द : शिखरिणी
गण : य म न स भ ल गु
सङ्केत : lSS – SSS – lll – llS – Sll – l – S