हामी सबैकाे संसारन्यूज

स्याङ्जा । स्याङ्जामा क्रियशिल पत्रकारहरूले एभिन्यूजका पत्रकार सुरेश रजकको हत्या गरिएकोमा विरोध जनाएका छन् । पत्रकार सुरेश रजकको हत्या र सञ्चार क्षेत्रमाथि भएको आक्रमणको विरोधमा देशभरका पत्रकार महासङ्घले प्रमुख जिल्ला अधिकार मार्फत गृहमन्त्रीलाई ज्ञापन पत्र बुझाएका छन् ।

यही चैत्र १५ गते काठमाडौँको तीनकुनेमा भएको हिंसात्मक आन्दोलनका क्रममा पत्रकार र पत्रकारिता क्षेत्र नै निसानामा परेको भन्दै नेपाल पत्रकार महासङ्घ स्याङ्जाले जिल्ला प्रकाशन कार्यालय स्याङ्जामा ध्यानाकर्षण सहितको ज्ञापन पत्र बुझाएको छ ।

महासङ्घले भिडियो खिच्ने क्रममा जलेर पत्रकार रजकको ज्यान गएको, अन्नपूर्ण दैनिकको कार्यालयमा आगो लगाई क्षति पुर्‍याएको, कान्तिपुर मिडियाको भवनमा तोडफोड गरेको, हिमालयन टिभीको सवारीमा आगजनी गरेको, पत्रकार दिनेश गौतमको आक्रमणमा परि खुट्टा भाँचिएको, फोटो पत्रकार निराज तामाङको क्यामेरा हराएको घटनाप्रति महासङ्घ गम्भीर रहेको भन्दै प्रमुख जिल्ला अधिकारमार्फत नेपाल सरकार समक्ष हत्याको गहिरो अनुसन्धान गर्न माग गरेको छ ।

साथै मृतक पत्रकारका परिवारलाई क्षतिपूर्ति दिन, क्षति पुगेका मिडिया हाउसहरूको क्षतिपूर्ति दिन र घाइतेको उचित उपचार गर्न समेत महासङ्घले माग गरेको छ ।