हामी सबैकाे संसारन्यूज

काठमाडौं । अख्तियार दुरुपयोग अनुसन्धान आयोगले नेपालको इतिहासमा पहिलो पटक पूर्वप्रधानमन्त्रीविरुद्ध भ्रष्टचारको मुद्दा दायर गरेको छ । बिहीबार अख्तियारले अख्तियारले एकीकृत समाजवादी पार्टीका अध्यक्ष एवं पूर्वप्रधानमन्त्री माधव नेपालसहित ९३ जनाविरुद्ध भ्रष्टचारको मुद्दा दायर गरेको हो ।

अख्तियारले पतञ्जलीको नाममा हदबन्दी छुटमा जग्गा खरिद गरी दुई महिनाभित्रै गैरकानुनी रूपमा हाउजिङ कम्पनीलाई बेच्ने स्वीकृति दिएको आरोपमा १३ बैंकरसहित ९३ जनालाई प्रतिवादी बनाएर विशेष अदालतमा मुद्दा दर्ता गरेको छ । दायर गरेका मुद्दा मध्ये करिब एक दर्जन व्यक्ति तत्कालिन सनराइज बैंकका उच्च अधिकारी छन् ।

अख्तियारका अनुसार मुद्दामा तत्कालिन सन्राइज बैंकका १३ उच्च अधिकारी रहेका छन् । आरोपित मध्ये तत्कालीन सनराइज बैंकका प्रमुख कार्यकारी अधिकृत (सीईओ) किशोरकुमार महर्जन, सहायक महाप्रबन्धक नीता प्रधान, जोखिम विभागका अधिकृत सुजित पोखरेल, शाखा प्रबन्धक राजीव सापकोटा र अधिकृत ममता पराजुली लगायत बैंकका अधिकारी छन् ।

यस्तै, सनराइजका जुनियर म्यानेजमेन्ट ट्रेनी एशु मैनाली, उपप्रबन्धक मनोज न्यौपाने, वरिष्ठ सहायक विक्रान्त कोइराला, प्रमुख व्यवस्थापक रविनकुमार नेपाल, सहायक महाप्रबन्धक आशा राणा अधिकारी, जोखिम व्यवस्थापन विभागका प्रमुख सञ्जयकुमार सिद्धी, अनुपालन विभागमा कार्यरत सुनिलरत्न स्थापित र नायब महाप्रबन्धक बलराम विष्ट छन् ।

अख्तियारका अनुसार तत्कालिन सनराइज बैंकका यी अधिकारीहरूल पतञ्जलीको नाममा काभ्रेमा रहेको सरकारी जग्गाको धितो बन्धक पारित गरि ऋण प्रवाह गरेका थिए । सनराइज बैंक हाल लक्ष्मी बैंकसँग मर्ज भई लक्ष्मी सनराइज बैंकको नामबाट एकीकृत बैंकिङ कारोबार गरिरहेको छ ।