हामी सबैकाे संसारन्यूज

ज्योतिका क्षेत्री,सुकुना, सिलगढी

१.
परिस्थितिको प्रखर घाम
कलम बन्छ चन्द्रमा
नपाउँदा मनासिब दाम ।

२.
भावनाहरू अक्षरमा झर्दैछ
बनाउनलाई काव्य सरिता
परिस्थितिले आँखा तर्दैछ ।

३.
चुनौतीले बिगुल बजाइरहन्छ
थुप्रिएर एकपछि अर्को
ठेलमठेल लाम लागिरहन्छ ।

४.
बल्लतल्ल एउटा फर्किन्छ
ढुक्कसँगले बस्न नपाई
अर्को फेरि तर्किन्छ ।

५.
सांसारिक नियम कस्तो
आफ्नो नियन्त्रणदेखि बाहिर
कताकता के नमिलेजस्तो ।

६.
.मामालाई पु¥याएर जेल
मरुन्जेल हाँस्छ भान्जा
नबुझेर प्रपञ्चको खेल ।

७.
षड्यन्त्र सजिन्छ झलमल्ल
आकर्षक पासो शिकारीको
शिकार झुक्किएर अलमल्ल ।

८.
कठै कठपुतलीको जुनी
अर्काको इसारामा नाँच्छ
सधैँ पैतालाको मुनि ।

९.
प्रकृतिसँग सिकौँ समानता
मानवता जोगाई राख्न
उम्रन नदिउँ दानवता ।

१०.
बस्छौँ पृथ्वीको काखमा
साझा संसार सबैको
अन्तमा मिल्छौँ खाकमा ।