हामी सबैकाे संसारन्यूज

धरान, (सुनसरी) । ‘फेसन’ र सांस्कृतिक विविधताको सहर भनेर चिनिने धरान अहिले तिहारको झिलिमिली उज्यालोमा झनै रौनकिलो बनेको छ । देशका अन्य सहरझैँ यहाँका घरघरमा झिलिमिली बत्ती बलिरहेका छन् । सडक गल्लीमा फूलमालाको सुगन्ध फैलिएको छ भने राति बत्तीको उज्यालोले सहर नै चम्किएको छ । दिउँसो बजारको भीडभाड र किनमेलले तिहारको उत्सवलाई झनै रंगीन बनाएको छ ।

तिहारलाई फूल, रङ र उज्यालोको पर्वका रूपमा मनाइन्छ । नेपाली घरघरमा दियो बाल्ने परम्परा पुरानो भए पनि अहिले माटाको दियो र मैनबत्तीको स्थान आधुनिक विद्युतीय बत्तीले लिएको छ । यससँगै विद्युतीय बत्तीको माग हरेक वर्ष बढ्दै गएको छ ।

धरानका व्यवसायी सुलिन श्रेष्ठ भन्छन्, “पहिले दियो र मैनबत्तीको चलन थियो, अहिले विद्युत सहज भएपछि ती सामान विस्थापित भइसकेका छन् । तिहार सुरु भएपछि झिलिमिली बत्तीको बिक्री धेरै बढ्छ । दैनिक करिब ५० देखि ६० हजार रुपैयाँसम्मको बिक्री हुन्छ ।”

घर, पसल र कार्यालयमा रातभर उज्यालो पार्ने चलन बढेसँगै बत्तीको व्यापार पनि फस्टाएको छ । बजारमा हाल ३० रुपैयाँदेखि २० हजार रुपैयाँसम्मका फरक–फरक डिजाइनका बत्ती पाइन्छन् । श्रेष्ठका अनुसार, “धरानका गल्लीगल्ली झिलिमिली बत्तीले सजिएका छन्, युवायुवतीहरू त्यसैमा सेल्फी खिच्दै सामाजिक सञ्जालमा तस्बिरहरू सेयर गर्छन् । देउसी–भैलोका समूहले घरघरमा पुगेर गीत र नृत्यको माधुर्य फैलाइरहेका छन् ।”

अर्का बत्ती व्यापारी कृष्ण यादवका अनुसार, धरानमा हरेक वर्ष नयाँ शैलीका बत्तीको माग बढ्दो छ । “सामाजिक सञ्जालमा देखेका दृश्यहरू देखाएर यस्तै चाहियो भन्छन् । यस वर्ष नयाँ डिजाइनका एलईडी स्ट्रिङ, रिमोट कन्ट्रोल बत्ती र नयाँ खालका झिलिमिलीहरू बढी बिक्री भइरहेका छन्,” यादवले बताए ।

सुनसरी उद्योग वाणिज्य सङ्घका महासचिव प्रभाव खतिवडाले पनि गत वर्षको तुलनामा यस वर्ष तिहारमा व्यापार करिब २० प्रतिशतले बढेको बताए । “हरेक घरमा झिलिमिली बत्ती र सजावटको आकर्षण बढेको छ । यसले बजारमा आर्थिक गतिविधि पनि बढाएको छ । फूल, माला, बत्ती र उत्सव मिलनले धरान साँच्चिकै उज्यालो सहर बनेको छ,” उनले भने, “सांस्कृतिक र आर्थिक दृष्टिले पनि तिहारले धरानलाई नयाँ ऊर्जा र चमक दिएको छ ।”