हामी सबैकाे संसारन्यूज

अलख निरन्जन लोहार
टीकापुर , कैलाली,हाल – भारत

विचार हो ठुलो यहाँ बनाउने समाज यो,
अथाह शक्ति सत्यमा हराउने छ पीर जो ।
सदैव नित्य ज्ञानमा फलेर बस्छ विद्वता,
विवेकमा विशाल भै रहन्छ मानवीयता ।१।

जलेर देह मिल्छ नै अवश्य पञ्चतत्वमा,
विचार बन्छ जीवनी शरीर मिल्छ राखमा ।
शरीरको बिचारको महत्त्व जान्नु पर्दछ,
अनेक चित्र नेत्रले अपार दृश्य भर्दछ ।२।

बगान भित्र फुलले सुगन्ध भर्छ जे गरी,
बुझेर कीर्ति छर्क है मनुष्यले सधैँभरि ।
झुकेर प्रार्थना गरौँ पुजौँ सदैव ईश्वर,
भलो बिना अरू यहाँ रहन्न साथ के छ र ?३।

बनौँ अनन्त निश्चल भगाउँदै कुभावना,
गरेर कर्म सक्कली फलोस् भनेर नामना ।
समाज देश निम्ति नै बनोस् सगर्व इज्जत,
हिमालले पहाडले र गर्छ फाँट स्वागत ।४।

तुनेर देश खोजमा चुनौ अपार चन्द्रमा,
चिनाउँदै बसौँ सबै बुझेर विश्व माझमा।
विभेद त्याग्नु पर्छ है समाज भाँडिने कुरा,
बुझौँ सबै बुझौँ सधैँ मनुष्य जोडिने कुरा ।५।

छन्द : पञ्चचामर
गण : ज – र – ज – र – ज – गु
सङ्केत : ISI – SIS – ISI – SIS – ISI – S