हामी सबैकाे संसारन्यूज

काठमाडौं । नेकपा (एमाले) ले संसदमा आफ्नो भूमिकालाई थप प्रभावकारी, व्यवस्थित र परिणाममुखी बनाउन संघीय संसदका सांसदहरूलाई प्रशिक्षण दिएको छ।

पार्टीले आयोजना गरेको प्रशिक्षण कार्यक्रममा संसदमा प्रस्तुत हुने विधेयक, नीति तथा समसामयिक राजनीतिक विषयमा प्रभावकारी ढंगले आफ्नो धारणा राख्ने, संसदीय अभ्यासलाई सुदृढ बनाउने तथा जनताका मुद्दालाई सशक्त रूपमा उठाउने विषयमा सांसदहरूलाई अभिमुखीकरण गरिएको छ।

प्रशिक्षणका क्रममा संसदीय मर्यादा, कानुन निर्माण प्रक्रिया, प्रभावकारी बहस, संसदीय निगरानी तथा सरकारका कामकारबाहीमाथि रचनात्मक रूपमा खबरदारी गर्ने विषयमा समेत छलफल भएको एमालेले जनाएको छ।

पार्टी नेतृत्वले जनअपेक्षाअनुसार संसदमा जिम्मेवार र प्रभावकारी भूमिका निर्वाह गर्न सांसदहरूलाई आग्रह गर्दै संसदलाई जनताका आवाज उठाउने सशक्त थलोका रूपमा उपयोग गर्नुपर्नेमा जोड दिएको छ।

एमालेले यस्ता प्रशिक्षण कार्यक्रमले सांसदहरूको संसदीय क्षमता अभिवृद्धि गर्नुका साथै पार्टीको संसदीय भूमिकालाई अझ प्रभावकारी बनाउन सहयोग पुग्ने विश्वास व्यक्त गरेको छ।