हामी सबैकाे संसारन्यूज

काठमाडौं । प्रधानमन्त्री वालेन्द्र (बालेन) शाहका प्रमुख राजनीतिक सल्लाहकार कुमार बेनले भारतको नयाँ दिल्ली पुगेर भारतीय राष्ट्रिय सुरक्षा सल्लाहकार (एनएसए) अजित डोभालसँग भेटवार्ता गरेको खुलासा भएको छ। । उक्त भेटवार्ताको विषय सार्वजनिक भएपछि प्रधानमन्त्री शाहको सम्भावित भारत भ्रमणबारे राजनीतिक तथा कूटनीतिक वृत्तमा चासो बढेको छ। यद्यपि, उक्त भेटवार्ताबारे नेपाल वा भारतका सरकारी निकायबाट हालसम्म कुनै औपचारिक पुष्टि भएको छैन।

जुलाईको पहिलो साता भएको भनिएको उक्त भेट मुख्यतः प्रधानमन्त्री शाहको सम्भावित भारत भ्रमणको तयारी, भ्रमणका एजेन्डा र नेपाल–भारत सम्बन्धका समसामयिक विषयमा केन्द्रित रहेको दाबी गरिएको छ।

प्रकाशित समाचारमा प्रधानमन्त्रीले आफ्नो पहिलो औपचारिक विदेश भ्रमण कुन देशबाट सुरु गर्ने भन्ने विषयमा छलफल भइरहेका बेला प्रमुख राजनीतिक सल्लाहकार बेनलाई दिल्ली पठाएको उल्लेख गरिएको छ। भारत भ्रमणका लागि आवश्यक वातावरण बनाउन र उच्चस्तरीय समन्वयका उद्देश्यले उक्त भेट भएको दाबी पनि गरिएको छ।

राष्ट्रिय स्वतन्त्र पार्टी (रास्वपा) का केही नेताहरू तथा प्रधानमन्त्री कार्यालयसँग सम्बद्ध स्रोतलाई उद्धृत गर्दै प्रकाशित समाचारमा कुमार बेन आफ्ना निकट सहयोगी रोशन खड्कासँग नयाँ दिल्ली पुगेको उल्लेख छ। त्यहाँ भारतीय राष्ट्रिय सुरक्षा सल्लाहकार डोभालसँग नेपाल–भारत सम्बन्ध, द्विपक्षीय सहकार्य तथा प्रधानमन्त्री शाहको सम्भावित भारत भ्रमणको प्रारम्भिक कार्यसूचीबारे छलफल भएको भनिएकाे छ।

सरकार गठन भएको करिब सय दिनपछि प्रधानमन्त्री शाहले कूटनीतिक सक्रियता बढाउने संकेत देखिएको विश्लेषण पनि सार्वजनिक भएको छ। त्यससँगै भारत भ्रमणको सम्भावित तयारीलाई सरकारको परराष्ट्र प्राथमिकतासँग जोडेर हेरिएको छ।

परराष्ट्र मन्त्रालयको औपचारिक संलग्नताबिनै राजनीतिक तहबाट प्रारम्भिक कूटनीतिक पहल अघि बढाइएको भन्दै कूटनीतिक वृत्तमा विभिन्न टिप्पणीहरू भइरहेका छन्।

यद्यपि, प्रधानमन्त्री तथा मन्त्रिपरिषद्को कार्यालय, नेपाल सरकारको परराष्ट्र मन्त्रालय, भारतीय विदेश मन्त्रालय तथा भारतीय राष्ट्रिय सुरक्षा सल्लाहकारको कार्यालयले उक्त भेटवार्ता वा प्रधानमन्त्री शाहको सम्भावित भारत भ्रमणबारे हालसम्म कुनै आधिकारिक पुष्टि गरेका छैनन्।