Sansar News
ऊ निडर उभिएको छ
घामको नजीकै पञ्चाग्नी बालेर
सत्यका खातिर
बिना बस्त्र हिउँमा जमेर
गरिरहेछ तपस्या लगातार
एउटा पूर्ण सत्यको ।
बिचारको धमिलो बाडीबाट
सङ्लिनु छ
एउटा न्याय, उसको नजरमा
आफू हिंडेर मृत्युको बाटो
खोजिरहेछ अरुको निम्ति
निर्भय निर्भय गोरेटो ।
आऊ प्रिय साथी
हामी पनि सँगै हिडौं
उसकै हात समाएर
उसैसँग काँध मिलाएर
मसीले गर्जिएर आज
बहिरो शासकको
कान खोल्नुछ
आँखा खोल्नुछ
जसले सत्य जानेर पनि
निदाइरह्यो देश निल्ने अहंकार लिएर
र हत्या गरिरह्यो
दूर सपनाका भ्रुरुणहरुको ।
वि.सं.२०७४ पुस २६ बुधवार ०७:०४ मा प्रकाशित
