१ बैशाख, किस्री, मुगु । आठ वर्षीया ठिल्लेसाङ्मु लामा एक वर्षयता गाउँदेखि स्कुल सम्म ‘प्रधानमन्त्रीकी छोरी’ भनेर चिनिएकी छन् । बैशाख १ गते रारा आएका बेला प्रधानमन्त्री केपी शर्मा ओलीले लामालाई अभिभावकत्व ग्रहण गर्दै बुद्ध माध्यमीक विद्यालय माग्रीमा भर्ना गराएका थिए ।
मुगुकार्मारोड गाउँपालिका स्थित माग्री गाउँकी लामाले ८३ प्रतिशत अंक ल्याएर कक्षा १ मा प्रथम स्थान हासिल गरेकी छन् । उनको पढाई सुरुदेखि नै राम्रो देखिएको निमित्त प्रधानाध्यापक चित्रबहादुर ओलीले बताए । उनका अनुसार घरमा लामालाई पढ्ने वातावरण छैन । परिवारमा कोही साक्षर छैनन् । विद्यालयबाहेकको समयमा घरायसी कामकाजमा व्यस्त हुने गरेकी छन् । पानी भर्ने, गाइवस्तु चराउने, वनपाखामा च्याउ टिप्ने लगायतका काम गर्छिन् ।
करिब ३ वर्ष अघि बाबु कार्माटोन्डुल लामाको मृत्यु भएपछि आमा छिजुले उनी र बहिनीको पालनपोषण गरिरहेको पनि ओलीले बताए । आइतबारको कान्तिपुर दैनिकमा मुगुबाट राज बहादुर शाहीले लेखेका छन् ।
वि.सं.२०७६ वैशाख १ आइतवार ०७:५७ मा प्रकाशित
