हामी सबैकाे संसारन्यूज

१ वैशाख, काठमाडौ । नेपाली चलचित्र वर्षमा एक सयको हाराहारीमा निर्माण तथा प्रदर्शन हुने गर्छ । वि.स. २०७५ मा ९८ वटा चलचित्र प्रर्दशन भए । संख्यात्मक अवस्था राम्रै भए पनि गुणस्तरमा कमी भएर हो वा अन्य कारणले कमै मात्र चलचित्रले मुनाफा कमाए । केहीले लगानी उठाए भने धेरैले गुमाए । यो वर्ष चलचित्र उद्योगको झन्डै ८० करोड रुपैयाँ लगानी डुबेको बताइएको छ ।

यो वर्षको चैत २९ गते यात्रा र ए मेरो हजुर ३ प्रदर्शन भए । दर्शकको प्रतीक्षामा रहेको चलचित्र ए मेरो हजुर ३ ले पहिलो दिनमै राम्रो व्यापार गरेको निर्माता तथा नायिका झरना थापाले जानकारी दिनुभयो ।

छोरी सुहाना थापालाई यसै चलचित्र मार्फत प्रवेश गराउनुभएकी निर्माता थापाले चलचित्र राम्रो हुने र दर्शकले माया गर्ने विश्वास व्यक्त गर्नुभयो । गत वर्ष ४४ वटा चलचित्र फ्लप भएको थियो भने यो वर्ष बढेर ८० पुगेको छ । गत वर्ष ९० वटा चलचित्र प्रदर्शन भएका थिए । आइतबारको गोरखापत्र दैनिकमा यलु जोशीले लेखेका छन् ।