हामी सबैकाे संसारन्यूज

ट्याप्प टाँसिएर बसेको
त्यो आकाशको विशाल छातीबाट
एक साँझ
सुटुक्कै झर्नु है तिमी
ऐ जून
म उभिएको धरातलमा ।
मलाई, एउटा सिङ्गै रात
तिमीसित बिताउनु छ ।
मेरो मनभित्रको
हजारौं कौतुहलहरु मेटाउनु छ ।

खुल्ला आकाशमा मग्न घुम्ने अधिकार
कसले दिएको तिमीलाई
सोध्नु छ ।
चम्किलो ताराहरुमाझ एक्लै डुल्छौ तिमी,
शंकाको घेरामा किन पर्दैन तिम्रो संस्कार
अब खोज्नु छ ।
अन्धकारसित लहसिदैं काटेको रातहरुको हिसाब
तिमीसित माग्नु छ ।
आकाशसंगको तिम्रो अबैध सम्बन्धको इतिहास
मलाई सुन्नु छ ।
मलाई तिम्रो हरेक खोट गन्नु छ
घामसँगको तिम्रो तालमेल बारे जान्नु छ ।

आफ्नो छेउमा तिमीलाई राख्नु छ
तिम्रो रुपको शीतलता मलाई चाख्नु छ ।
अहौ !!
सबैलाई मख्खै पार्ने तिम्रो मुस्कान !
तिम्रो मुस्कानको चम्किलो आवरण
कोट्याइ कोट्याइ हटाउनु छ
र तिमीभित्रको त्यो कुरुप धब्बा
सारा दुनियाँलाई देखाउनु छ
नाप्नु छ मलाई तिम्रो दागहरुको आयतन
खोताल्नु छ त्यसको गहिराई
र तिमीलाई बेस्सरी दुखाउनु छ ।
त्यसैले तिमी सुटुक्कै आउनु है
एक साँझ,
मलाई , एउटा सिङ्गै रात
तिमीसित बिताउनु छ
निलाम गर्नु छ मलाई तिम्रो सुन्दर अस्तित्व ।
मान्छे हूँ म
मलाई मेरो गुण देखाउनु छ
मलाई मानव धर्म निभाउनु छ ।।