हामी सबैकाे संसारन्यूज

म
कविता लेखिरहेछु
या कविता मलाई लेखिरहेछ
म
हरेक दिन
कसौंडी र ताप्केमा
डाडु पन्युँले
कविता लेख्छु
प्रेसर कुकरमा
हरेक साँझ बिहान
जोड जोडले
सिट्ठी बज्छन्
मेरा कविताका अक्षरहरू
नुन, मसला र बेसारले निखार्छ मेरो कवितालाई
खुर्सानीले तिखार्छ मेरो कवितालाई
र
थाल थालमा प्रसारित हुन्छन्
कच्यौरा कच्यौरामा प्रकाशित हुन्छन्
अनेक प्रतिक्रिया सहित
जब उदरस्त हुन्छन् मेरा कविता
म
थाल कच्यौरा
डाडु डाडु पन्युँ
ताप्के र कुकरका
टाङटाङ टुङटुङसङ्गै
हरेक साँझ बिहान
मेरा कविताको मलामी जान्छु ।

यसैगरि दोहोरीइ रहन्छन् मेरा कविता
तर थाहा छैन मलाई
म
कविता लेखिरहेछु
या
कविता मलाई लेखिरहेछ ।

५ कार्तिक,२०७६