हामी सबैकाे संसारन्यूज

३ मसिंर, दुबई । ख्यातिप्राप्त विमान कम्पनी, इमिरेट्स एअरलाइनले एअरबस ३५०–९०० (वाइडबडी) ५० वटा विमान खरीद गर्न युरोपेली बहुराष्ट्रिय विमान कम्पनी एअरबससँग १६ अर्ब अमेरिकी डलर बराबरको सम्झौता गरेको छ ।

कम्पनीले सोमबार दिएको जानकारीअनुसार उक्त विमानहरूले सन् २०२३ को मेदेखि सेवा दिनेगरी सम्झौता भएको हो । “संयुक्त अरब इमिरेट्सको ध्वजाबाहक विमान कम्पनीले एअरबस ३५० का ५० विमान किन्ने सम्झौता भएको घोषणा गर्न पाउँदा खुसी लागेको छ ।,” इमिरेट्स कम्पनीका अध्यक्ष तथा प्रमुख कार्यकारी अधिकृत शेख अहमद् विन साइद अल-माक्तौमले सञ्चारकमीसँग बताए ।

इमिरेट्सले विश्वका विभिन्न ८४ मुलुकका १५८ गन्तव्यमा उडान भर्दै आएको छ । हाल कम्पनीसँग २६७ ठूला तथा १०० भन्दा बढी एअरबस रहेका छन् । “सम्झौता हुनु एअरबसका लागि खुसीको कुरा हो,” बहुराष्ट्रिय विमान निर्माण कम्पनी एअरबसका प्रमुख कार्यकारी अधिकृत गुलियाम फाउरले बताए । उनले थपे, “इमिरेट्सले एअरबसलाई रोजेकोमा हामी गौरवान्वित भएका छौँ ।”