हामी सबैकाे संसारन्यूज

तिमी
कलमले लेखिरह्यौ, लेख
म
मस्तिष्कले लेख्छु, लेखिरहन्छु

तिमी अवशर लेख, स्वार्थ लेख
म मान्छे लेख्न कोसिस गर्छु
ऊ भित्रको घाउ लेख्छु
म सकेसम्म मलम लेख्छु
लेख तिमी ! कलमैले लेख !

म धर्ती लेख्छु , आकास लेख्छु
समाज चित्रण गर्ने प्रयासमाछु
बाटा लेख्छु, गोरेटा लेख्छु
तिमी ज–जस्का वायोडाटा लेख्ने हो, लेख

बिहानको उषा लेख्छु
गोधुली साँझ लेख्छु
ठिकै छ, तिमी प्रतिस्पर्धा लेख
प्रतिशोध लेख
म जे लेख्छु , हृदयले, प्रेमले र मनले लेख्छु

तिमी पद लेख
म पीडा लेख्छु

तिमी लेखक
म अक्षर प्रेमी
फरक यत्ति हो,
तिमी भित्र साहित्यकारको आकाङ्क्षा
म भित्र प्रकाशको आकाङ्क्षा
बस्,
तिमी र म बिचको अन्तर यही निर हो
तिमी कलमले लेख्छौ
म मनले लेख्छु