हामी सबैकाे संसारन्यूज

फैसला जस्तो आओस् मन्जुर हुनुपर्छ ।
लड़ाई होस् या प्यार भरपुर हुनुपर्छ ।

उमेर पुग्यो भन्दै कहाँ मिल्छ छाडा हुन्
जोडी बाँधिन त एउटा दस्तुर हुनुपर्छ ।

आँखाले हेरेकै भरमा पेट भरिन्छ कहाँ
गरिखान त मेहनती मजदूर हुनुपर्छ ।

पीडा कस्ले बुझ्ने स्वार्थी संसार भयो
मागि खाने त असक्त या मजवुर हुनुपर्छ ।

धेरै भो हातले ठेला उठाई मेहनत गरेको
अब त यी हत्केलामा कोहिनुर हुनुपर्छ ।

जग्गा हुँदै नहुने र अथाह हुनेलाई के थाहा
महत्व बुझ्न मात्रै नाममा चारधुर हुनुपर्छ ।

मैले के गरे मलाई नै थाहा छैन हिजो !
उनको दिलबाट हट्न मेरै कसूर हुनुपर्छ ।

जसलाई नाम सोधें उनले गाउँ बताइनन्
सीता नाम थियो पक्कै जनकपुर हुनुपर्छ ।

श्रीमतीकै भर पर्दा कस्ले चिन्छ दुनियाँमा
चर्चित हुन थोरै आफ्नै चरित्र झुर हुनुपर्छ ।