हामी सबैकाे संसारन्यूज

७ पुस , काठमाडौँ । अहिले अमलाको सिजन छ । अमला हामीमध्ये धेरैलाई मन पनि पर्छ होला तर कतिलाई यो अमिलो हुने भएकाले मन नपर्न पनि सक्छ ।

गाउँघरमा सजिलै पाइने अमला खाँदा जति स्वादिष्ट हुन्छ स्वास्थ्यको दृष्टिकोणले पनि उति नै गुणकारी छ । अमलामा प्रशस्त मात्रामा गालिक एसिड, क्याल्सियम, सेलुलोज, टान्निक एसिड र अल्बुमिन जस्ता शरीरलाई आवश्यक तत्त्व पाइने हुँदा यसलाई स्वास्थ्यको दृष्टिकोणले औषधीय गुणयुक्त फलको रूपमा लिइन्छ ।

एउटा अमलामा ६ सय मिलि ग्राम भिटामिन सी पाइन्छ । आयुर्वेदिक दृष्टिकोणले पनि अमलाको अति नै महत्व छ । अमलामा रहेको तत्वले दिमाग तेज बनाउँछ । त्यसैगरी छालाको समस्याबाट दूर राख्छ ।

भनिन्छ ३ वटा सुन्तलामा भन्दा १ वटा अमलामा धेरै भिटामिन हुन्छ र अमलाको रुखको फेदमा छायाँमा बसेर खानाले मात्रै पनि अनेक रोगहरु निको हुन्छ ।

यस्तो छ अमला खाँदाको फाइदा
-अमलाको सेवनले बुढोपन हुनबाट जोगाउँछ भने मधुमेह तथा मुटुसम्बन्धी रोग लाग्नबाट समेत बचाउँछ ।

-नियमित अमला सेवनले पिसाब पोल्ने जस्ता पिसाबसम्बन्धी समस्याबाट छुटकरा पाउन सकिन्छ ।

-नाथ्री फुट्ने, महिनावारीमा बढी रगत जाने आदिमा अमलाको नियमित सेवनले रक्तश्राव हुने क्रम घट्छ ।

-अमला सेवनले रुघाखोकीसमेत बिसेक हुन्छ ।यो खाँदा अनुहारको चमक बढाउन सहयोग गर्दछ ।

-अमलाको धुलो एक चम्चा महसंग खाँदा यसले रगतमा चिनीको मात्रा कम गरी मधुमेह नियन्त्रण गर्न मद्दत गर्दछ ।

-अमलाले शरीरमा भएको बिषालु पदार्थ हटाई शरीरलाई रोगहरुबाट बचाउंछ ।

-सुकाएको अमलाको धुलो पानीसंग खाँदा कब्जियतको समाधान गर्छ ।

-अमलाको तेलले कपाल फुल्न रोक्छ र कपाल बाक्लो र सुन्दर बनाउन मद्दत गर्छ ।

-अमलाको प्रयोगले शरीरमा कोलेस्टेरल लेभल घटाउँछ र भयानक मुटु रोगबाट बचाउँछ ।

-अमला खानाले स्मरण शक्ति बढाँउछ । दिनको दुईतीनवटा ताजा अमला खाने वा बिहान बेलुका खाना खानुअघि आधादेखि एक चम्चा सुकेको अमलाको चूर्ण खाँदा खाना रुची बढ्छ ।

-अमलाको चूर्णले दाँत मल्ने, अमलाको पानीले कुल्ला गरेमा स्वास गन्हाउने समस्या हट्छ । केही समयसम्म अमला पनि नियमित रूपले खाने गर्नुपर्छ ।

-अमलामा भिटामिन सी प्रशस्त पाईने भएकाले छालाका रोग, रक्तनली र मुटुका रोगबाट बच्न र निको पारी शरीरमा भिटामिन सीको कमीलाई पूर्ति गर्न अमलाको नियमित प्रयोग अति प्रभावकारी हुन्छ ।