हामी सबैकाे संसारन्यूज

२१ पुस, काठमाडौँ । बलिउडकी चर्चित अभिनेत्री दिपिका पादुकोणको मुख्य भूमिका रहेको चलचित्र ‘छपाक’ जनवरी १० बाट प्रदर्शन हुँदैछ । पादुकोण अहिले प्रमोशनमा व्यस्त रहेकी छन् ।

निर्देशक मेघना गुलजारले निर्देशन गरेको उक्त चलचित्र ‘छपाक’ केहीदिन अगाडि कानुनी झमेलामा पनि परेको थियो । उजुरीकर्ता राकेश भारतीले फिल्मको कथा चोरी भएको र फिल्मको प्रोमो हेरेरै ‘छपाक’ आफूले लेखेको स्किृप्टमा आधारित भएको थाहा पाएको बताउँदै आएका छन् । उजुरीमा गुलजारले एसिड आक्रमण पीडितमाथि आफूले फिल्म बनाउन चाहेको खुलाएका छन् । उनले उक्त फिल्मको स्किृप्ट दर्ता पनि गराइसकेको बताएका छन् ।

गुलजारका अनुसार उक्त चलचित्रका लागि प्रियंका चोपडा, कंगना रणावत, श्रद्धा कपुर, अनुष्का शर्मा र ऐश्वर्या रायको नाम फाइनल गरेका थिए । प्रियंकालाई यो चलचित्रको कथा मन परेका कारण उनी यस चलचित्रमा लगानी समेत गर्न चाहन्थिन् तर उनी बाहिर भएका कारण समय मिलाउन सकिनन् ।

यस्तै श्रद्धा कपुर र अनुष्का शर्माले व्यस्तताका कारण यो चलचित्रमा काम गरेनन् । कगंनाको दिदीमाथि पनि कुनै समयमा एसिड प्रहार भएको थियो । जसका कारण कगंनाले आफू भावुक हुने बताउँदै यो चलचित्रमा काम गरिनन् । यस्तै ऐश्वर्याले भने पर्दामा एसिड आक्रमण भएकी युवतीको भूमिकामा आफू नराम्री देखिने भएकाले यो चलचित्र नगरेको गुलजारले बताएका छन् ।