हामी सबैकाे संसारन्यूज

२३ मंसिर, भक्तपुर । भक्तपुरका प्रजिअ एवम् जिल्ला बालकल्याण समितिका अध्यक्ष तेजप्रसाद पौडेलले इँटाभट्टाका काममा बालबालिकालाई नलगाउन व्यवसायीलाई निर्देशन दिनुभएको छ ।

उहाँले बालबालिकालाई श्रममा लगाएको पाइए कानुनबमोजिम त्यस्ता व्यवसायीलाई कारबाही गर्ने चेतावनीसमेत दिनुभयो ।

जिल्ला बालकल्याण समिति र व्यवसायीबीच विहिबार सम्पन्न छलफलमा प्रजिअ पौडेलले इँटाभट्टामा बाबुआमासँग नआएका बालबालिकालाई प्रवेशमै रोक लगाउन व्यवसायीलाई निर्देशन दिनुभयो ।

उहाँले अभिभावकविहीन बालबालिका बालमजदुरका रुपमा इँटाभट्टामा काम गर्न आए त्यस्ता बालबालिकाका लागि उचित संरक्षणको छुट्टै व्यवस्था समेत गरिने प्रतिबद्धता व्यक्त गर्नुभयो ।

सो अवसरमा भक्तपुर इँटा उद्योग व्यवसायी सङ्घका अध्यक्ष नातिभाइ ह्योम्बाले इँटाभट्टामा सञ्चालित भट्टी पसलको अनुगमन गरी बन्द गर्न प्रशासनको ध्यान आकर्षण गर्नुभयो ।

उहाँले बालबालिकालाई श्रममा लगाउने व्यवसायीको कुनै योजना नरहेको र अभिभावकसँगै आउने बालबालिकाको उचित शिक्षादीक्षाका लागि उद्योग आवश्यक सहयोग गर्न तयार रहेको बताउनुभयो ।

महिला विकास अधिकारी नीलाकुमारी घिमिरेले छ महिनाभन्दा कम अवधिका सुत्केरीलाई इँटा बनाउने र बोक्ने जस्ता जोखिमयुक्त कार्यमा नलगाउन आग्रह गर्नुभयो ।