हामी सबैकाे संसारन्यूज

२१ माघ काठमाडौं । एमसीसीसम्बन्धी अध्ययन कार्यदलको सदस्यसमेत रहेका परराष्ट्रमन्त्री प्रदीपकुमार ज्ञवाली एमसिसीबारे कडा रुपमा प्रस्तुत भएका छन् । एमसीसीविरुद्ध बाहिर आएका कुराहरु अनावश्यक, अतिरञ्जित र प्रायोजित भएको उनको भनाई थियो । उनले सरकारले देश र जनताको हितलाई केन्द्रविन्दुमा राखेर यस विषयलाई उठान गरेकोे भन्दै बजारमा अनावश्यक विषयमा बहस गरेर मित्र राष्टहरुसँगको सम्बन्धलाई कसैले पनि तीतो बनाउन नहुने बताए ।

नेपालको राष्ट्रिय हित, जनताको लाभ र देशको विकास जेमा हुन्छ सरकार त्यसैमा अघि बढ्ने भन्दै एमसिसीको विस्तृत रूप (फुलफर्म) थाहा नभएकाहरुले यसका विरुद्धमा बजारमा बहस शुरु गरेको उनको टिप्पणी थियो । उनले चुइगम चपाउँदा रस सकिएर दाँतमा टाँसिने र त्यसको कुनै स्वाद नहुने जस्तै प्रकृतिको बहस एमसिसीका बारेमा अहिले बजारमा चलिरहेको बताए ।

नेकपाले आइतबार मात्र पूर्वप्रधानमन्त्री झलनाथ खनालको संयोजकत्व भीम रावल र प्रदीप ज्ञवाली सदस्य रहनेगरी एमसीसी अध्ययन कार्यदल गठन गरेको थियो ।

खनाल नेतृत्वको समितिलाई १० दिनभित्र अमेरिकी सहयोग मिलेनियम च्यालेञ्ज कर्पोरेशन (एमसीसी)सम्बन्धी पार्टीलाई प्रतिवेदन बुझाउन भनिएको छ ।

एमसीसीको आलोचना गर्दै आएका खनाल र रावल तथा समर्थन गर्दै आएका ज्ञवाली सहभागी कार्यदलले कस्तो सुझाव देला भन्ने जिज्ञासा यतिबेला सर्वत्र रहेको पाइन्छ ।

एमसीसी कार्यदलको पहिलो बैठक सम्पन्न, भयो यस्तो सहमति