हामी सबैकाे संसारन्यूज

तिम्रो षडयंत्रको खिलाफ चट्टान
बनेर उभिएका छन्
मेरा कलमका धार
अब शब्दहरुकै प्रहारले
तिम्रो धरातल भष्म पारेर
इतिहासको नया पन्ना कोर्नु छ मलाई ।

लासहरुको दलिन बिछाएर खड़ा गरेको
तिम्रो शक्तिशाली साम्राज्यमा
मेरा कलमका बन्दुकहरुले
शब्दहरुका गोली बर्षाएर
एउटा माटोको इतिहास लेख्नु
छ मलाई ।

तिम्रो शोषण बिरुद्ध
यो जिउँदो लासहरुले बुलन्द
गर्न नसकेका
विद्रोहका आवाजहरु
मेरो कलमको आवाजले
तिम्रो धरातलमा ज्वालामुखी बिस्फोट गरेर
एउटा स्वतन्त्रको कथा लेख्नु छ
मलाई ।

एकदिन तिम्रो शोषणको साम्राज्य
माथि
आकाशबाट कालो बादल जस्तै गर्जमान भएर
शब्दहरुको परमाणु बज्रपात गरि
तिम्रो साम्राज्यको पतन गर्नुछ मलाई
अनि आफ्नै माटोको कथा
लेख्नु छ मलाई ।