हामी सबैकाे संसारन्यूज

१.
एकाएक मडारिदै आउँछन्, ती नागहरु
अतृप्त नै रहेछन्, निलेर आफ्ना भागहरु
कति भोककै छट्पटी हरे ! ती पिपाशुमा,
ओहो ! हेर यो कलियुग ! साधु सन्तका रागहरु ।
२.
सिङ्गो जिन्दगीको अरुबाटै लागत उठाउनेहरु छन्
प्रत्यक्ष अप्रत्यक्ष अरुबाटै फगत उठाउनेहरु छन्
जो जति सक्षम र अब्बल कहलिएता पनि यहाँ,
हरे ! अवलाबाटै मायाको राहत उठाउनेहरु छन् ।
३.
हावा कुसमयमा आउँछ छुन्छ, जान्छ
अनेक प्रदुषण ल्याउँछ छुन्छ,जान्छ
समयले जरा गाडिएको छ वृक्षको,
मात्र औकात ! पात हल्लाउँछ जान्छ ।
४.
मुर्ति र मन्दिर बिचमा दूरी, हुन्छ कि नाई
थुँगा च्यात्ने पुजारीको बहादुरी, हुन्छ कि नाई
देव ,देवी मन्दिर बिच, हुन्छ कि हुन्न एकता
बल्छी,चारो बिचमा मजबुरी, हुन्छ कि नाई ।
५.
श्रृङ्गार भन्दा अलिपर लक्ष्य छ कि छैन
कुसलता वौद्दिकतामा दक्ष छ कि छैन
समाजको तुलोमा जोखिन्छ्यौ नारी तिमी,
मेरो प्रश्न ?घरमा छोरीको सुरक्षा छ कि छैन ।