हामी सबैकाे संसारन्यूज

२८ मंसिर, ब्रसेल्स (बेल्जियम) । युरोपियन युनियन (ईयू) र क्युबाबीच राजनीतिक सम्बन्धमा सुधार ल्याउनका लागि सोमबार एक महत्वपूर्ण सम्झौतामा हस्ताक्षर भएको छ ।

सम्झौताले दशकौँदेखि असामान्य देखिएको ईयू र क्युबाबीचको राजनीतिक सम्बन्ध सुधारका साथै व्यापार र सहकार्यलाई विस्तार गर्नेमा ईयूका विदेश मामिला प्रमुख फेडेरिका मोघेरिनीले विश्वास व्यक्त गर्नुभयो ।

‘पोलिटिकल डाएलग एन्ड कोअपरेसन एग्रीमेन्ट’ नाम दिइएको सम्झौतामा ईयूका तर्फबाट मोघेरिनी तथा क्युबाका तर्फबाट विदेशमन्त्री ब्रुनो रोड्रिगेज पारेजले हस्ताक्षर गर्नुभएको थियो ।

सम्झौताले ब्रसेल्स र हवानाबीच राजनीतिक तथा आर्थिक सहकार्य गर्दै दिगो विकास, प्रजातन्त्र, मानवअधिकार, ऊर्जा, खानी, दूरसञ्चार तथा पर्यटनलगायतका क्षेत्रमा योगदान गर्ने बताइएको छ ।

ईयूले यो किसिमको सम्झौता क्युबा बाहेकका दक्षिण अमेरिकी मुलुक र क्यारेबियन क्षेत्रमा यसअघि नै गरिसकेको थियो । सिन्ह्वा