हामी सबैकाे संसारन्यूज

७ फागुन, काठमाडौं । महिनावारी नभएको पुष्टि गर्न भित्री कपडा खोल्न लगाउने भारतको एउटा विद्यालयका प्रधानाध्यापक, छात्रावास रेक्टर, र चतुर्थ श्रेणीका कर्मचारीलाई निलम्बित गरिएको छ । पश्चिमी राज्य गुजरातमा रहेको सहजानन्द गर्ल्स इन्स्टिट्युट (एसएसजीआई)मा अध्ययन गरिरहेका छात्राहरुले महिला कर्मचारीको अगाडि भित्री कपडा फुकाल्नु परेको बताएका थिए ।

६८ जना छात्रालाई कक्षाकोठाबाट शौचालयमा लगेर एक एक गरी भित्री कपडा फुकाल्न लगाइएको बताइएको छ । यो घटना गएको ११ फेब्रुअरीमा एसएसजीआई परिसरको छात्रावासमा भएको थियो ।

पीडित छात्राहरूका अनुसार महिनावारीसम्बन्धी नियमलाई कतिपय छात्राले उल्लङ्घन गरेको भन्दै कलेजले यस्तो गरेको हो । कलेजको नियमअनुसार महिनावारी भएका महिलाहरूलाई मन्दिर तथा भान्सामा प्रवेश गर्न र अरु विद्यार्थीलाई छुन प्रतिबन्ध छ ।