हामी सबैकाे संसारन्यूज

१३ फागुन, काठमाडौं । उपप्रधानमन्त्री ईश्वर पोखरेलले पूर्व राजपरिवारको नामबाट नेपाल ट्रष्टको नाममा आएको जग्गा प्रचलित कानूनमा रही लिज अवधि थप गरिएको दाबी गरेका छन् । मंगलबार पत्रकार सम्मेलन गर्दै ट्रष्टका अध्यक्षसमेत रहेका पोखरेलले भने ‘यहाँ हुने सबै काम पारदर्शी रूपमा भएका छन्, गोकर्ण रिर्सोटको म्याद अवधि पनि यसैगरी थप भएको हो।’

उनले ट्रष्टको नाममा देशभर २१ हजार ५ सय ६२ रोपनी ४ आनाभन्दा धेरै जग्गा रहेको पनि जानकारी दिएको छ। पोखरेलले १२ वटा जिल्लामा ट्रष्टको नाममा सम्पत्ति रहेको बताए। नेपाल ट्रष्टको नाममा रहेको मध्ये काठमाडौका ६ स्थानमा लिजमा दिइएको उनले बताए ।

गोकर्ण फरेष्ट रिर्सोट, दरबारमार्ग, कमलादी, टेकु र कमलादीको घर तथा जग्गा लिजमा दिइएको उनले बताए । यो दरबारले दिएको र हाल थप गर्ने कार्य केहीमा भएको उनले बताए।

ट्रष्टका नाममा ७८ करोड नेपाली रुपैयाँ, अमेरिकी डलर १ लाख ४८ हजार र बेलायती पाउन्ड ५० हजार चल सम्पत्ति रहेको समेत उनले जानकारी दिए । यसका साथै केही होटलमा शेयर पनि रहेको उनले बताए । ट्रष्टका सम्पत्ति अब स्वास्थ्य शिक्षा र पर्यटन क्षेत्रमा लगाउने उनको भनाइ थियो।