हामी सबैकाे संसारन्यूज

काठमाडौं । राष्ट्रिय सभा सदस्य नारायणकाजी श्रेष्ठले अव नेपाललाई समृद्ध मुलुकमा रुपान्तरण गर्नुको विकल्प नभएको बताएका छन् । आजै राष्ट्रियसभा सदस्यको शपथ लिएका उनले व्यवहारमै आर्थिक विकास र सम्बृद्धिको कार्यभार पुरा गर्नुको विकल्प नभएको बताए । उनले प्रकृति र पुर्खाले आर्जेको यस्तो सुन्दर देश हुँदाहुदै लाखौँ युवा खाडी मुलुकमा पसिना बगाउन बाध्य भएको भन्दै अव त्यस्तो अवस्थाको अन्त्य गर्नुपर्ने बताए ।

राष्ट्रियसभा बैठकमा बोल्दै उनले भने ‘लोकतन्त्र, संक्रमण र बहुमतको सरकार छैन भनेर उम्कन मिल्ने अवस्था छैन । अव समृद्ध मुलुकमा रुपान्तरण गर्नुको विकल्प छैन । त्यो जिम्मेवारी अब हाम्रो काँधमा आएको छ ।’

नेकपाका प्रवक्तासमेत रहेका उनले सरकारले आफ्ना काममा आत्मसमीक्षा गर्नुपर्ने बताए । जनादेश सरकारले पाएपनि सबै काम सरकारले मात्र गर्न नसक्ने भन्दै प्रमुख प्रतिपक्षको समेत सहयोगमा समृद्धिको यात्रामा अघि बढ्नुपर्ने बताए । उनले राष्ट्रिय एकताका सवालमा भारतले मिचेको लिम्पियाधुराको नेपाली जमिन फिर्ता गर्न पहल गनुपर्ने, लोकतन्त्रका आधारभुत मान्यतालाई विकास गर्दै प्रतिगमनका सारा षड्यन्त्र असफल पार्नुपर्ने बताए ।

विकासको फड्को मार्ने विषयमा पनि सवै शक्ति एकजुट हुुनुपर्ने र अहिलेको गतिबाट मात्रै सामाजिक आर्थिक विकासमा सवै एकजुट हुन अपिल गरे । श्रेष्ठले सत्ताको चरित्र थोरै निरंकुश हुने खतरा हुने भन्दै प्रतिपक्ष पनि रचनात्मक प्रतिपक्षको भूमिकामा मात्रै नरहेर विरोधवादमा फस्ने खतरा रहने भएकाले त्यसतर्फ सबैको ध्यान जानुपर्ने धारणा राखे ।