Sansar News
७ चैत, अबुधावी (रासस/एएनआई) । संयुक्त अरब इमिरेट्स (यूएई) ले सबै प्रकारका श्रम स्वीकृति दिन बन्द गरेको छ ।
नोबेल कोरोना भाइरसले सङ्क्रमण फैलिँदै गएकाले अर्को सूचना प्रकाशित नहुँदासम्मका लागि श्रम स्वीकृति बन्द गरिएको अधिकारीहरुले जनाएका छन् ।
देशको श्रम मन्त्रालयले राष्ट्रिय आपत, सङ्कट र प्रकोप व्यवस्थापन प्राधिकरणसँगको समन्वयमा यस्तो निर्णय गरेको हो । खाडी मुलुक यूएईमा बिहीबारसम्म ११३ जनामा कोरोना भाइरसको सङ्क्रमण पुष्टि भएको छ ।
विश्वभरि महामारीको रुपमा फैलिएको कोरोना भाइरसका कारण दुई लाख सात हजार जना प्रभावित भएका छन् । कोरोनाको सङ्क्रमण अहिलेसम्म १६६ देशमा पुगेको छ । कोराना भाइरसका कारण आठ हजार ६५७ जनाको मृत्यु भएको विश्व स्वास्थ्य सङ्गठनले जनाएको छ ।
वि.सं.२०७६ चैत ७ शुक्रवार ०८:२४ मा प्रकाशित
