हामी सबैकाे संसारन्यूज

जिन्दगीको महासागरमा
समयको शक्तिशाली भुकम्प गएसङ्गै
बिकराल समस्या सुनामी बनेर आएपछि
डुबेको हो मेरो सपनाको टाइटानिक ।

त्यही टाइटानिकमा चढेका थिए-
मेरो भविष्यका सम्पूर्ण योजनाहरु ।

सपनाको टाइटानिक डुबेसङ्गै
डुबेको हो मेरो जिन्दगीको घाम
त्यसैमा परेर अकालमै मरेका हुन-
मेरा सीमित इच्छा, आकाङ्क्षा र रहरहरु ।

टाइटानिकसङ्गै डुबेको
मेरो जिन्दगीको घाम
त्यसपछि फेरि कहिल्यै नउदाएपछि
अन्धकार छाएको ह-
मेरो सिङ्गो संसारमा
र त बाध्य भएर
आत्महत्या गरेका हुन्-
मेरा बाँकी आशा र भरोसाहरुले ।

त्यसैले,
जवर्जस्ती धकेलेरै
छेउ लाग्न बाध्य पारिएको
मेरो आफ्नै जिन्दगी
साच्चै जिन्दगी जस्तो नहुनुमा
मेरो कुनै गल्ती छैन ।

बलात्कृत कुमारी आमाको
अभागी कोखबाट जन्मिएकी
बिनाबाबु कि हतभागी सडकछाप छोरी
म बसन्जरी नेपाली निर्दोष छु श्रीमान !