हामी सबैकाे संसारन्यूज

२७ वैशाख, काठमाडौं । काठमाडौँ उपत्यकामा आइतबारदेखि सवारी चलाउन ‘टाइम कार्ड’ लागू हुने भएको छ ।

उपत्यकाका प्रमुख जिल्ला अधिकारी, नेपाल प्रहरी प्रमुख, ट्राफिक प्रहरीलगायतका सरोकारवाला निकायहरूबीच आज भएको छलफलले भोलि आइतबारदेखि काठमाडौं उपत्यकामा सवारी चलाउन ‘टाइम कार्ड’ लागू गर्ने निर्णय गरेको हो ।

शुक्रबारदेखि उपत्यकामा केहि खुकुलो भएको लकडाउनमा अत्याधिक सवारी साधन गुड्न थालेपछि सवारी सञ्चालनमा कडाइ गर्न टाइम कार्ड सुरु गर्न लागिएको महानगरीय ट्राफिक प्रहरी महाशाखा प्रमुख भीमप्रसाद ढकालले जानकारी दिए ।

‘टाइम कार्ड’ लागू भएसँगै अब तोकेको समयमा मात्र सवारी साधन चलाउन पाइनेछ ।

जसअनुसार सरकारी कार्यालयका कर्मचारीहरूलाई बिहान ९ बजेदेखि साढे १० बजेसम्म कार्यालय जान र बेलुका ५ बजेदेखि ६ बजेसम्म घर फर्कने समय तोकिएको छ ।

बैङ्क तथा वित्तीय संस्थाका कर्मचारीहरूका लागि बिहान ९ बजेदेखि साढे १० बजेसम्म अफिस गइसक्नु पर्नेछ भने बेलुका साढे ३ बजेदेखि ५ बजेसम्म फर्कनु पर्नेछ ।

खाद्यान्न, दूध, तरकारी तथा अत्यावश्यक खाद्य सामग्री बोक्ने सवारी साधनले बिहान १० बजेभित्र ढुवानी गरिसक्नुपर्ने हुन्छ ।
निर्माण सामग्री बोकेका ठूला सवारी बेलुका ८ बजेपछि देखि बिहान ६ बजेसम्म मात्र उपत्यकाभित्र प्रवेश गर्न पाउनेछन् ।

औषधि र खानेपानीको सवारी साधानको हकमा भने टाइम कार्ड लागू नहुने बताइएको छ ।