भारतले नेपाली भूभाग लिपुलेक हुँदै मानसरोबर जाने सडक बनाएकोमा हामी नेपालीहरु स्तब्ध भएका छौं । भारतको यस्तो कदमले नेपाललाई दुःखित तुल्याएको छ ।
नेपालको छातीमा भारतीय गाडीहरू गुड्न सुरु भएको छ र सरकारको नालायकीपनका कारण नेपाली जनता आफ्नो भूमिमा विदेशीले परेड खेलेको टुलुटुलु हेरेर बस्न बाध्य भएका छौं । यस्ता कार्य निन्दनीय छन् । हामी यि अशोभनीय कार्यको घोर भत्सर्ना गर्न चाहन्छौं । र सुगौली सन्धिपछि महाकालीको स्रोत सम्बन्धमा नयाँ सन्धि भएको भए सार्वजनिक गर भारत सरकार ।
कालापानी लगायत महाकाली पूर्वका क्षेत्र भारतीय सुरक्षाकर्मीलाई बस्न दिने को हुन ? आधार सहित आधिकारिक जानकारी देऊ सरकार र सुगौली सन्धिअनुसार लिम्पियाधुरा मुहान भएको काली (महाकाली) नदी नै अन्तर्रा्ष्ट्रिय सीमा नदी भएको र त्यसपछि कुनै सम्झौता भएको छैन । यदि भएको भए प्रमाणित गर भारत सरकार ।
हामीले भारतीयहरुलाई सदैब सम्मान गर्यौँ तर नेपालको सिमानाभूमीमा पटक पटक किन अतिक्रमण किन गर्दछौ भारत सरकार ? यस्तो कार्य शोभनीय छैन । प्रभावकारी कूटनीतिक पहल नहुँदा नेपाली भूमिमा विदेशीले परेड खेल्दा समेत टुलुटुलु हेरेर बस्नु परेको छ र नेपाली भूमिमाथि नांगो हस्तक्षेप गरेर भारतले नेपाली भूभाग लिपुलेक हुँदै मानसरोबर जाने ८० किलोमिटर सडक निर्माण गरिसक्दा समेत नेपाल सरकारले थाहा नपाएको र अहिले उदघाटन भइसकेपछि मात्र नेपाल सरकारलाई थाहा हुँदा हाम्रो सरकार कति निरिह छ भन्ने कुरा यसबाट प्रष्ट हुन्छ । अहिले संपूर्ण राष्ट्रवादीहरुले एकपटक फेरि भारतलाई खबरदारी गर्नु परेको छ ।
कोरोना संक्रमणको त्रासमा भए पनि लकडाउनमा भए पनि भारतलाई दवाब दिन फेसबुक अन्तवार्ता लेख रचना टुइटर आदी मार्फत खबरदारी गर्न संपूर्ण नेपाली जनतामाझ आग्रह गर्दछु । नेपाल सरकारले तुरुन्त कुटनैतिक ध्यानाकर्षण गराइदिन पुनः माग गर्दछु ।
वि.सं.२०७७ वैशाख २८ आइतवार ११:३१ मा प्रकाशित
