Sansar News
३१ जेठ, काठमाडौँ । प्रतिनिधिसभाको आजको बैठकबाट दुई तिहाइभन्दा बढी मतले पारित गरिएको नेपालको वास्तविक नक्शा निशान छापमा समावेश गर्न प्रस्तुत ‘नेपालको संविधान (दोस्रो संशोधन) विधेयक, २०७७’ आइतबार राष्ट्रिय सभामा पेस हुने कार्यक्रम रहेको छ ।
प्रतिनिधिसभाबाट पारित भएको विधेयक अब राष्ट्रिय सभामा गएको छ । प्रतिनिधिसभाले शनिबार नै उक्त विधेयक पारित भएको सन्देश राष्ट्रियसभामा पठाएको छ ।
प्रतिनिधिसभाको सन्देशसहित ‘नेपालको संविधान (दोस्रो संशोधन) विधेयक, २०७७’ लाई राष्ट्रिय सभाको आइतबारको बैठकमा प्रस्तुत हुने सम्भावित दैनिक कार्यसूचिमा राखिएको छ ।
राष्ट्रिय सभाको सूचना अनुसार आइतबारको बैठकको सम्भावित कार्यसूचीमा राष्ट्रिय सभाका सचिव राजेन्द्र फुयालले प्रतिनिधिसभाबाट सन्देशसहित प्राप्त नेपालको संविधान (दोस्रो संशोधन) विधेयक, २०७७ लाई सभा समक्ष टेबुल गर्ने रहेको छ ।
राष्ट्रिय सभाले संशोधन विधेयक पारित गरे त्यो सन्देश प्रतिनिधिसभालाई पठाइनेछ र त्यो सन्देशलाई सभामुख अग्निप्रसाद सापकोटाले प्रमाणित गरेर प्रमाणीकरणका लागि राष्ट्रपति विद्यादेवी भण्डारीकहाँ पठाउनेछन् ।
राष्ट्रपतिले उक्त विधेयक प्रमाणीकरण गरेपछि संशोधन कार्यान्वयनमा आउने छ । त्यसपछि नेपालको निसान छापमा कालापानी, लिपुलेक र लिम्पियाधुरासमेटिएको नयाँ नक्सा कामकाजमा आउनेछ ।
वि.सं.२०७७ जेठ ३१ शनिवार २०:४२ मा प्रकाशित
