हामी सबैकाे संसारन्यूज

जस्ले देश र राष्ट्रको हित गरे किल्ला सिमाना बने
लेखे गौरवको कथा रगतले बेनाम योद्धा बने
पाखण्डी कपटी र लम्पट ठगी चढ्दा भए टाकुरा
चर्चामा उनकै छ नाम जहिले ज्ञानी बने माकुरा ।।१।।
**
आत्मामा कटुता लिएर मुखमा मुस्कान मीठा कुरा
गीता हात महा सदैव बगली खल्ती भरी छन छुरा
योगी ध्यान बिना हुदैछ जड त्यो सन्यास के कामको
ढोंगी ज्ञान बिना हुदैछ सठ त्यो विद्वान भो नामको ।।२।।

**

हिंसा गर्न सिपालु बाघ चितुवा बन्दैछ मान्छे पनि
लोभी साधु बनेर हिड्दछ अहो ! के बन्छ योगी मुनि
भित्री पाप रहस्य गोप्य तरिका छोपेर छाती मुनि
बस्छन् घात लगाइ बाज जसरी मान्छे बनिन्छन उनै ।।३।।

**

बेचिन्छन् पहरा नदी र झरना खोला र नाला गरा
पैसा दौलतमा इमान सकियो बिक्री हुदैछन् धरा
सच्चा मित्र र साथ छैन जगमा पैसा बन्यो बाधक
आमाको पनि लाज बेच्छ पशुले सन्तान भो घातक ।।४।।

**

चाँदीको चलखेलमा छ दुनियाँ ब्वासो बन्यो शासक
पापी कर्म लुकाउने जन यहाँ बन्दै गयो चालक
मीठा भाषण बोल्छ लेख्छ जसले विद्वान ठूलो भयो
बोल्नेका कनिका भुसै पनि बिके आश्चर्य के मा रह्यो ? ५।।