हामी सबैकाे संसारन्यूज

५ साउन, काठमाडौँ । चीनको स्वशासित क्षेत्र तिब्बतको खासा क्षेत्रमा रहेको केरुङ च्छो पोखरी (ताल) भरिएर फुट्न सक्ने सम्भावना रहेसँगै सिन्धुपाल्चोकको भोटेकोशी र बाह्रबिसे क्षेत्रमा नदी किनाराका बस्ति जोखिममा परेको छ।

न्यालम क्षेत्रमा अध्याधिक वर्षा भैरहेका कारण पोखरीमा पानी भरिन गई फुट्न सक्ने सम्भावना रहेको भन्ने जानकारी चीनतर्फबाट आएको हुँदा भोटेकोशी गाउँपालिका बाह्रबिसे नगरपालिका लगायत स्थानीय तहहरुका बजार तथा मानववस्तीलाई सर्तक रहन भन्दै जिल्ला प्रशासन कार्यालय सिन्धुपाल्चोकले सूचना जारी गरेको छ ।

पोखरी फुट्दा क्षति पु¥याउन सक्ने ठाउँका सर्वसाधारण, स्थानीय तहहरु लगायत सम्पूर्ण सरोकारवाला व्यक्ति एवम् संघसंस्थाहरुलाई सर्तकता अपनाउन, सम्भावित जोखिमबाट बच्न आवश्यक पूर्व तयारी अपनाउन भनिएको छ ।

उच्च जोखिममा परेका ती ठाउँ वरपरका नागरिकलाई उक्त क्षेत्र छाडी सुरक्षित ठाउँमा जाने व्यवस्था मिलाउन जिल्ला विपद् व्यवस्थापन सिमिति सिन्धुपाल्चोकसँग पनि अनुरोध गरिएको छ ।

चीनले त्यसवरपरका आफ्ना नागरिकलाई सुरक्षित स्थानमा सारिसकेको छ ।