हामी सबैकाे संसारन्यूज

काठमाडौं । नेकपा अध्यक्ष पुष्पकमल दाहाल ‘प्रचण्ड’को निजी सचिवालयले पार्टी स्थायी समिति सदस्य जनार्दन शर्मा ‘प्रभाकर’ टाढिएको भन्ने चर्चा सत्य नभएको बताएको छ । बिहिबार एक प्रेस व्यक्तव्य जारी गर्दै सचिवालयले नेता शर्माले प्रचण्डलाई नै सहयोग गरिरहेको बताएको हो ।

सचिवालयले नेता शर्मा पार्टी एकताको पक्षमा लागिरहेको र प्रचण्डलाई सहयोग गरिरहेको बताएको छ । ‘पार्टी एकतादेखि आजसम्मको काममा कमरेड प्रभाकरले अध्यक्ष कमरेड प्रचण्डलाई सहयोग गर्दै आउनुभएको विदितै छ, अहिलेको पार्टी भित्रको आन्तरिक बहसमा पनि उहाँ पार्टी एकताका पक्षमा लाग्नुभएको हो’, व्यक्तव्यमा भनिएको छ, ‘कमरेड प्रभाकरमाथि अध्यक्ष कमरेड प्रचण्डसँग जोडेर गरिएका भ्रामक प्रचारहरुलाई खारेज गर्दछौं ।’

व्यक्तव्यमार्फत प्रचण्ड र नेता शर्मामाथि जोडेर आएका समाचार गलत भएको सचिवालयको दाबी छ । सचिवालयले प्रचण्ड र नेताशर्मामाथि जोडेर गरिएका चर्चा निन्दनीय भएको पनि बताएको छ ।

केही दिनअघि स्थायी कमिटी सदस्य शर्माले सामाजिक सञ्जालमार्फत आफुलाई कुनै पद प्राप्तिको लोभ लोभ नभएको बताएका थिए। उनले पार्टी एकताको पक्षमा रहेको हुनाले आफूलाई कुनै पदको लोभ नभएको बताएका थिए। उनीमाथि गृहमन्त्री बन्‍ने लोभमा राष्ट्रपतिको कार्यालयसम्म पुगेको आरोप लागेको थियो।

यस्तो छ सचिवालयले जारी गरेको व्यक्तव्य