हामी सबैकाे संसारन्यूज

काठमाडौं । प्रहरीले काठमाडौं गोंगबुमा भएको विभत्स हत्याका बारेमा धेरै तथ्यहरु फेला पारेको छ । महानगरीय अपराध महाशाखाले जनाएअनुसार मृतक कृष्णबहादुर बोहरा र अभियुक्त कल्पना मुडभरी (पौडेल) फेसबुकमार्फत चिनाजानी भई तीन÷चार वर्षदेखि सम्बन्धमा थिए ।

तथ्यमा खुल्न आएअनुसार मृतकले पौडेलको फेक फेसबुक आईडी खोली चलाउने गरेको र आफुँ अनुकुल दबाब दिने गरेका थिए । अनुसन्धानअनुसार घटनाको कारण आर्थिक लेनदेन पनि देखिएको छ ।

घटनाको दिन पनि मृतक बोहोरा होटलबाट ७२ प ५६४४ नम्बरको स्कुटी प्रयोग गरि पौडेलको कोठामा पुगेका थिए । अनुसन्धानमा खुलेअनुसार पौडेलले मृतकलाई हत्याको दिन दही, चिउरा, मासु र भोड्का रक्सी खान दिएकी थिइन् ।

मृतकलाई रक्सी खुवाएपछि पौडेलले हत्या गरेको प्रहरी अनुसन्धानले देखाएको छ । घटना स्थलमा भेटिएका प्रमाणअनुसार मृतकलाई स्लिपिङ ट्याबलेटसमेत खुवाइएको हुनसक्ने सम्भावना छ ।

हत्यापश्चात शव व्यवस्थापनमा पौडेलले आफ्नी १० कक्षामा पढ्दै गरेकी छोरीको समेत मद्दत लिएको प्रहरी अनुसन्धान बताउँछ ।

प्रहरीले जनाएअनुसार मृतकलाई हिर्काउन हम्मरको प्रयोग गरिएको थियो भने शवलाई टुक्र्याउन धारिलो हतियारको प्रयोग भएको थियो । प्रहरीले उल्लेख गरेअनुसार हत्या गर्न नाम्लो, सल र डोरीको समेत प्रयोग भएको भेटियो ।

प्रहरीले धारिलो हतियार, हम्मर, घाँटी कस्न प्रयोग भएको सल, नाम्लो, स्लिपिङ ट्याबलेटको खोल र केही मोबाइल सेट बरामत गरेको छ ।

अनुसन्धानले बताएअनुसार हत्या पश्चात पौडेलले मतृकको शव व्यवस्थापन गरि आफुँ चिनेजानेको व्यक्तिको एम्बुलेन्समार्फत माईतीघर चितवन पुगेकी थिइन् । उनि शव व्यवस्थापन लगत्तै चितवन पुगेकी थिइन् । चितवन प्रहरीको समन्वयन उनलाई शक्तिखोर–९, कालिका न.पा. चिवतवनबाट पक्राउ गरिएको हो ।

आइतबार बिहान टोखा नगरपालिका वडा नं. १० गोंगबु नवज्योति मार्गमा टाउको, खुट्टा र जीउ छुट्टाएको अवस्थामा शवको टुक्रा भेटिएको थियो । झोलामा रगत लतपतीएको देखेपछि स्थानीयले प्रहरीलाई खबर गरेका थिए ।

टुक्रा–टुक्रामा भेटिएको शव कसको हो भन्ने प्रहरीले छुट्याउन सकेको थिएन । प्रहरीले शव पहिचान गर्न नसकेपछि फोटोसमेत सार्वजनिक गरेको थियो । उक्त घटनाको विषयमा मंगलबार प्रहरीले पत्रकार सम्मेलन गरि अभियुक्त र घटनाबारे सार्वजनिक गरेको हो ।

सम्बन्धित समाचार

गोंगबु हत्याका आरोपीलाई गरियो सार्वजनिक, पक्राउ आरोपी टेलिसिरियलकी कलाकार