हामी सबैकाे संसारन्यूज

काठमाडौं । लगानी बोर्डको प्रमुख कार्यकारी अधिकृत सुशील भट्टको नियुक्ती खारेज गर्न ट्रान्सपरेन्सी इन्टरनेशनल नेपालले माग गरेको छ । ट्रान्सपरेन्सी इन्टरनेशनलका अध्यक्ष खेमराज रेग्मीले एक प्रेस विज्ञप्ती जारी गर्दै नियुक्ती खारेजीको माग गरेका हुन् ।

उनले विज्ञप्तीमा कालोसूचीमा परेका अन्तराष्ट्रिय कम्पनीहरुको एजेन्टको रुपमा काम गरि बदनाम भएका व्यक्तिलाई नियुक्ती गरिनु आपत्तिजनक भएको बताएका छन् । सुशासनका माध्यमबाट आर्थिक समृद्धि ल्याउने घोषणा गरेको सरकारले भट्टजस्ता विवादित व्यक्तिलाई लगानी बोर्डमा ल्याउनु विरोधाभासपूर्णं भएको रेग्मीको भनाई छ ।

ट्रान्सपरेन्सी इन्टरनेशनल नेपालले विज्ञप्तीमार्फत भट्टको नियुक्ती खारेज गर्दै स्वच्छ र निष्कलंकीत पात्रलाई लगानी बोर्डमा ल्याउन माग गरेको छ ।

यसअघि सोमबार मात्रै नियुक्ति बदरको माग गर्दै अधिवक्ता जयबहादुर भुजेलले उच्च अदालत पाटनमा रिट दायर गरेका थिए । उनले रिटमा बोर्डको सीईओ बन्न भट्टको योग्यता नपुगेको दाबी गरेका छन् ।

गत साउन १९ मा बसेको मन्त्रिपरिषद बैठकले भट्टलाई लगानी बोर्डको प्रमुख कार्यकारी अधिकृत (सीईओ)मा नियुक्त गरेको थियो । अर्थमन्त्री डा. युवराज खतिवडा नेतृत्वको छनौट समितिले उनको नाम सिफारिस गरेको थियो ।

भट्टको नियुक्तीप्रति सत्तारुढ नेकपाकै नेताहरु असन्तुष्ट छन् । पार्टीका कार्यकारी अध्यक्ष पुष्पकमल दाहाल ‘प्रचण्ड’ले नियुक्ती लगत्तै प्रधानमन्त्री केपी शर्मा ओलीलाई भेटेर असन्तुष्टीसमेत जनाएका थिए ।

यस्तो छ ट्रान्सपरेन्सी नेपालको विज्ञप्ती

सम्बन्धित समाचार

सुशील भट्टको नियुक्तिविरुद्व उच्च अदालतमा रिट दायर