हामी सबैकाे संसारन्यूज

काठमाडौं । पाटन उच्च अदालतले लगानी बोर्डका नवनियुक्त प्रमुख कार्यकारी अध्यक्ष (सिइओ) सुशील भट्टलाई तत्काल काम गर्न नदिन आदेश दिएको छ ।

अधिवक्ता जयबहादुर भुजेलले दायर गरेको रिटमाथि मंगलबार सुनुवाई गर्दै अदालतले तत्काल काम गर्न नदिन आदेश दिएको हो । न्यायाधीश नहकुल सुवेदीको एकल इजलासले भट्टलाई बोर्ड प्रमुखको हैसियतमा काम गर्न रोक लगाउने आदेश गरेको हो ।

‘‘मन्त्रिपरिषद्को साउन १९ गतेको सो निर्णय कार्यान्वयन नगर्नु नगराउनू, जे अवस्थामा छ सोही अवस्थामा राख्नू’, आदेशमा भनिएको छ । उच्च अदालतले आगामी साउन ३२ मा अर्को पेशी तोकेको छ ।

अधिवक्ता भुजेलले सोमबार भट्टको नियुक्ती बदरको माग गर्दै उच्च अदालत पाटनमा रिट दायर गरेका थिए । भुजेलले रिटमा भट्टको नियुक्ती कानूनसम्मत नभएको र उनको योग्यता नपुगेको दाबी गरेका थिए ।

गत सोमबारको मन्त्रिपरिषद बैठकले भट्टलाई लगानी बोर्डको प्रमुख कार्यकारी अधिकृत (सीईओ)मा नियुक्त गरेको थियो । अर्थमन्त्री डा। युवराज खतिवडा नेतृत्वको छनौट समितिले उनको नाम सिफारिस गरेको थियो ।

सरकारले भट्टलाई नियुक्ती गर्ने निर्णय गरेसँगै निर्णय भने विवादमा तानिएको छ । सत्तारुढ नेकपाकै नेताहरुले पनि सरकारको निर्णयप्रति आक्रामक रुपमा असहती जनाएका छन् । विवादास्पद छविका भट्टकाे नियुक्तीप्रति विपक्षी दलहरुले पनि प्रश्न उठाएका छन् ।

सम्बन्धित समाचार

सुशील भट्टको नियुक्तिविरुद्व उच्च अदालतमा रिट दायर

विवादास्पद छविका सिइओ भट्टको नियुक्ती खारेज गर्न ट्रान्सपरेन्सी इन्टरनेशनलको माग (विज्ञप्तीसहित)