हामी सबैकाे संसारन्यूज

यो बाले बनाएको घर,
बा जस्तै बुढो भएको छ,
बा जानु भो,
तर घर गएन
मलाई यो घर तिम्रो
बा जस्तै लाग्छ,
जो पोहोर सालको भैचालोमा पनि
किन्चित हल्लेन
र त यो घर छ म छु अनि तिमी छौ ।

यो लामो निरल तिम्रो बाले एक्लै ल्याएको,
यो आगनको छपनि तिम्रो बाले एक्लै बोकेको,
ल हेर, तिम्रो बाले लागाएको बाँस,
कति अग्लो भएको छ,
तिम्रो बा जस्तै,
जो अग्लिएर पनि,
आफ्नो धराताल बिर्सेनन्
र त धरा बाकिरह्यो ।
तिम्रो लागि पुर्खाले छाडेको,
कोसेली ।

ल हेर, त्यो तुलसीको मोठ,
तिम्रो बाले सारेको तुलसी,
म तुलसी देख्दा तिम्रो बालाई सम्झिन्छु,
जो कुरिरहन्छ रित्तो आगन,
म जस्तै,
र त लाग्छ आगनमै छन् भगवान ।
त्यो तिम्रा बाले ल्याएको सिलौटो,
जहाँ अझै पनि घोटिन्छ लोहोरो,
र पिसिरहन्छ जिजिविषा,
मलाई त्यो लोहोरो तिम्रो बाजस्तै लाग्छ
जो जिन्दगीभर घोटिइरहे तिम्रो लागी,
र एक्लै गए
सब छाडेर,
तर मलाई डर लाग्छ,
बाबु !
तिमी बा बनेपछि,
के छाडेर जान्छौ हँ तिम्रो छोरालाई ?

कुशे औशी विषेश