हामी सबैकाे संसारन्यूज

अनेक रागमा बगून् सदैव काव्यका मसी
वसन्त मुस्किए जसै कलात्म भावमा बसी
निबद्ध नित्य साधना लिएर स्वच्छ चाहना
हरेक शब्द शब्दमा गरूँ म काव्य अर्चना ।।

निमेषमै हटून सबै विभेद तुच्छ तर्कना
प्रवाह बग्नमै मिठो म गर्छु प्रेम वन्दना
प्रसन्न भै उषासँगै म उठ्न चाह गर्दछु
सुशान्त शैल काखमा असङ्ख्य प्रीत भर्दछु ।।

सुगन्ध हुन्छु बागका म पुष्पभित्र घुल्दछु
म रङ्ग बन्छु फूलका र पत्रपत्र चुम्दछु
म गर्छु साधना सधैं पवित्र चेत भर्नमा
सुभाव काव्यमा सधैं प्रयत्न गर्छु छर्नमा ।।

निरुद्ध कार्य पूर्णता म गर्छु युद्ध शब्दले
प्रवाह बन्छु देशको स्वकाव्यकै निनादले
अथाह भक्ति शक्तिको निसर्तकै म सर्तमा
म झुक्छु राष्ट्रभक्त भै रहन्न स्वार्थ-गर्तमा ।।

म सृष्टि भै स्वयं रचूँ बलिष्ठ देशरक्षक
म प्राणमा स्वयं बसूँ विषाक्त चुस्न उत्सुक
पवित्र देवकुञ्ज यो गरून् विशुद्ध चिन्तन
र बुद्ध जन्मियून् यहाँ बनोस् धरा तपोवन ।।

छन्द: पञ्चचामर