हामी सबैकाे संसारन्यूज

काठमाडौं । कोरोना भाइरस (कोभिड–१९)का कारण विपन्न तथा न्यून आय भएका नागरिकहरुको जीवनयापनमा परेको कठिनाईप्रति साझा पार्टीले सरकारको ध्यानाकर्षण गरेको छ । शुक्रबार एक विज्ञप्ती सार्वजनिक गर्दैै साझाले लकडाउनका कारण निम्न वर्गीय नागरिकहरु चुल्हो बाल्ने नसक्ने अवस्थामा रहेको जानकारी गराएको हो ।

‘साँझ(विहान खान पनि नपाउने गरेर चरम कठिनाईमा परेका हजारौँलाई राजधानीसहित देशका विभिन्न भागमा मनकारी व्यक्ति तथा संस्थाहरूले खाना खुवाईरहेका दारूणिक दृश्य सार्वजनिक भईरहेका छन्’, साझा पार्टीका सहप्रवक्ता शरदराज पाठकले विज्ञप्तीमा भनेका छन्, ‘दैनिक ज्यालादारी गरेर साँझ विहान छाक टार्नेहरूदेखि नियमित आयको स्रोत बन्द भएका निम्नमध्यम वर्गीय नागरिकहरूसम्म चुल्हो बाल्नै नसक्ने पीडादायी अवस्थाबाट गुज्रिएको लामो समय भइसक्यो।’

कयौँ नागरिक खान नपाएर र विरामीहरू अस्पताल नपाएर मर्ने अवस्था सिर्जना भएको बताउँदै पार्टीले यस्तो अवस्थामा पनि सरकार कमिसन, ठेक्कापट्टा, शक्ति संघर्ष, राजनीतिक षडयन्त्र र चुनाव हारेकालाई राष्ट्रिय सभामा लैजाने प्रपञ्चमा व्यस्त रहेको आरोप लगाएको छ ।

विज्ञप्तीमार्फत साझाले ‘कोही भोकै बस्नु पर्दैन र गरिबीका कारण कोही भोकै मर्दैन’ भन्ने प्रधानमन्त्री कहाँ छन् भनि प्रश्न पनि गरेको छ । ‘विपद्को घडीमा समेत जनतालाई राहत प्रदान गर्न मूलतस् व्यक्ति र संस्थाहरू नै चाहिने हो भने स्थानीय सरकार केका लागि हो ?’ साझाको प्रश्न छ, ‘‘अब कोही भोकै बस्नु पर्दैन, गरिबीका कारण कोही भोकै मर्दैन’ भन्ने प्रधानमन्त्री कसका लागि हुन् ? स्थानीय सरकार र अन्य सरकारी संयन्त्रलाई राहतका लागि निर्देशनमात्र दिएर पुग्दैन। खै उनीहरूले राहत पाएका ?’

साझाले देशभरी देखिएका कारुणकि अवस्थालाई तत्काल सम्बोधन गर्न पनि सरकारसँग माग गरेको छ । सरकारी संयन्त्रलाई तत्काल यथोचित सञ्चालन गरि राहत दिन साझाको माग छ ।