Sansar News
फूलका वस्तीमा
तेजाब खन्याएर
ढुङ्गाका कठोर वस्तीहरुमा
के को उत्सव मनाइदै छ
मुजुरा जलेको बगैंचामा
कसरी फुल्छन्
झरीला झरीला फूलका थुँगाहरु ।
धिक्कार छ-ढोङ्गी आदर्श
सिंदुरको एकधर्सो
लक्ष्मणरेखाभित्र
अदृश्य बन्दीगृह निर्माणगरि
प्रेमको सुकोमल वस्तीमा
भयङ्कर डढेलो सल्काउँदेछ ।
कालो धूवाँको मुस्लोभित्र लुकेर
आफ्नै प्रेमिकालाई
बलात्कार गरिरहेको हुन्छ
प्रेमको आदर्श पुजारी
जहाँ
प्रेमका मधुर उमङ्गहरु
त्रास र भयको तप्तअग्निमा
हुर्हुर्ती जलिरहरका हुन्छन् ।
वि.सं.२०७७ कात्तिक २२ शनिवार ०८:३० मा प्रकाशित
