हामी सबैकाे संसारन्यूज

शनिवारको दिन साहित्यिक कार्यक्रमको आयोजना गरिएको थियो । प्रमुख अतिथिका रुपमा निम्त्याईएका उनी समय अगावै पुगे । सहभागी भन्दा पहिले अतिथि पुग्दा आयोजक असहज महसुस गरिरहेका थिए, तैपनि आफ्नो तयारीमा जुटिरहे ।

दर्शक, स्रोता र सहभागीको आगमनसँगै बिस्तारै हल भरिन थालेपछि आयोजकले राहत महसुस गरे ।

आसन ग्रहणको क्रम प्रारम्भ भयो । अध्यक्ष, प्रमुख अतिथि, विशिष्ट अतिथि, अतिथि , बरिष्ट लेखक, विद्वान समालोचक आदिलाई तिनको परिचय दिंदै आसन ग्रहण गराउँदा र खादा–मालाले स्वागत गर्दा केही समय लाग्यो ।

कार्यक्रम प्रारम्भ हुनै थाल्दा प्रमुख अतिथि हात जोड्दै सबैसँग बिदा माग्न थाले, भने ‘ठूलो मान्छे हुनु पनि गाह्रो छ, हु्न्न भनुँ साथीहरू रिसाउने, जाउँ भ्याईनभ्याई हुने । अझै दुईवटा कार्यक्रममा प्रमुख अतिथि हुन जानु छ, यहाँको लागि निर्धारित समय सकियो, त्यसैले बिदा पाउँ ।’

यति भनिसक्दा उनी मूलद्वारमा पुगिसकेका थिए ।