हामी सबैकाे संसारन्यूज

काठमाडौं । अमेरिकाका लागि प्रस्तावित राजदूत एंव पूर्व अर्थमन्त्री डा. युवराज खतिवडाले अमेरिकी आर्थिक सहयोग परियोजना मिलेनियम च्यालेन्ज कर्पोरेसन (एमसीसी) सम्झौताबारे आफुँले सहजीकरण गर्ने बताएका छन् । बिहिबार संसदीय सुनुवाईका क्रममा एमसीसी आवश्यक भएको भन्दै सहजीकरणका लागि भूमिका खेल्ने बताएका हुन् ।

एमसीसी सम्झौताप्रति देखिएको अस्पष्टतालाई अमेरिकी अधिकारी समक्ष पुर्याउने र स्पष्ट पार्ने उनले बताए । ‘मेरो कार्यकालमा एमसिसीका विषयमा नेपालमा उठेका कुराहरु अमेरिकामा बुझाउने काम हुन्छ,’ प्रस्तावित राजदूत डा खतिवडाले भने, ‘स्पष्ट पार्ने विषयमा वहाँहरु तयार नै हुनुहुन्छ। म यसमा सहजीकरण गर्छु।’

उनले आफू मन्त्री भएको बेलामा एमसीसी पारित गर्न निकै प्रयत्न गरेपनि त्यो सफल हुन नसकेको बताए ।

एमसीसी सम्झौताको स्वार्थ नेपालको विकास मात्रै भएको भन्दै उनले बुझाईलाई स्पष्ट बनाएर जानुपर्ने बताए । उनका अनुसार यस विषयमा आफुँले सरकारको निर्देशनअनुसार नै सहजीकरण गर्ने बताए ।