Sansar News
तिम्रो काँधमा बन्दुक राखी गोली अर्कैले चलाउँछ
आफ्नो बारीमा रोप्छौ बिरुवा फल अरुले फलाउँछ ।।१।।
लुते नै भयौ अब त रहेन तिम्रो प्रतिष्ठा र सान
यिनले तिमीलाई रछानको कसिंगरसरी गलाउँछ ।।२।।
जिन्दगीको तिम्रो खाता यिनले आफै चलाएर
ढंग तिम्रो नपुग्नाले तिमीलाई एकदिन ढलाउँछ ।।३।।
रत्तिभर बुद्धि–विवेक छैन तिम्रो दिमागमा
त्यही भएर ऐंजेरु सरी शत्रुनै शत्रु पलाउँछ ।।४।।
होशियार बन तिमी अब ज्ञान नेत्र खोल्नुपर्छ
नत्र यिनले तिमीलाई ओछ्यानमा नै जलाउँछ ।।५।।
चाँगुनारायण नपा-२, झौखेल भक्तपुर
वि.सं.२०७७ मंसिर ६ शनिवार ०९:२६ मा प्रकाशित
